老鬼時段.

星期日既電視黃金時段，
唔知由幾時開始變左老鬼演唱會時段。

記得睇左好多個禮拜呢個時候既無線，
都係汪阿姐既名曲滿天星，
果班阿叔阿姐老到乜咁，重係到扭扭下咁，
扭扭下重扭埋一舊，真係睇到呆晒。

頂唔順之下轉過去睇亞視，
見到肥佬黃偉文係到開Concert，
即係暈左 ……

D後生仔有乜辦法唔出去蒲呢。

特休特訓.

今日又係一個月一次既特休日，即係輪休，
特休係我地大佬用既名詞。

前果期日日都早出晚歸，好耐都冇好好咁訓番一教，
所以今日日上三竿先起身。

結果訓到個頭都痛埋，真係訓又死唔訓又死。
不過梗係訓死好過攰死啦，哈哈！

決擇.

今日打完波之後，我地愉田三寶係樓下公園餵左一陣蚊。

我地隊長肥哥遇到工作上既難題，
初出茅廬既佢要揀工做，
有銀行文員同埋九鐵既月台票務助理揀，各有千秋。

由於我都做過下銀行文員，覺得好悶，
所以我就會揀做九鐵，起碼呢一間公司都係一個新既嘗試。

肥哥話錢最重要，所以我地既結論都係做九鐵，
因為人工高D之餘，搭車又唔洗錢，真係慳番唔少。

買Printer.

家陣既家庭電腦用品真係夠晒平民化，
買一部All In One既打印機都係七百幾蚊，
有得Print 相、Print 文件、影印、掃瞄，
真係底到爛。

回想起我中五果陣要做project走去買printer，
我重記得果部係Epson黎，買成$1500蚊，
剩係可以print野，真係唔底。

今時今日，千五既All in one printer已經有埋LCD螢幕仔，
print相勁方便果隻，真係賤物鬥窮人呢。

達文西咪咪.

呢期日日係度睇幾年前好Hit既小說達文西密碼。
我本身都唔係鐘意睇書果隻，
之前既日記都講過我好動多過好靜。

但係呢本達文西密碼真係有一個魔力係度，
故事吸引，節奏明快，內容充實。
最勁係佢用一D宗教既秘密引你睇落去，
令到你會好想知道故事既發展係點樣。

如果呢本書可以用黎拍戲就一定大收旺場啦。

飯後吃個梨致癌物質可排出.

教授領導的研究小組去年9月發表報告指出，飯後吃個梨，
積存在人體內的致癌物質可以大量排出。

調查結果顯示，
吸煙或者吃烤肉等在體內聚集的強致癌物質多環芳香烴，
在吃梨後會顯著降低。
研究人員對吸煙者進行了試驗，
讓他們在4天內連續每天吃750g左右的梨，
並測定吃梨前後小便中多環芳香烴的代謝產物羥基芘含量。
測後發現，吸煙6小時後再吃個梨，
人體血液內羥基芘含量會大量經尿液排出。
如果 不吃梨，羥基芘毒素只能排出很少量。

調查結果說，加熱過的梨汁含有更大量的抗癌物質 ─ 多酚。
給注射過致癌物質的小白鼠喝這樣的梨汁，
白鼠的尿液中就能排出大量的1-羥基芘毒素，從而預防癌患。

"梨和加熱過的梨汁，都有加速排出體內致癌物質的功能。"
專家建議在人們熱衷於吃煎烤食品、快餐類食品的今天，
飯後吃一個梨不失為一種值得推薦的健康生活方式。

行山之謎.

上幾星期有一位警察行山失踪，
到左今日都未搵得番，而佢失踪之前有致電警局求救。

今日又有一個年青人行山失踪，
原本有幾位朋友同佢一齊行山，
但係行到一半就覺得唔舒服，要休息一下。
之後佢就失踪左。

佢失踪之後曾經打比佢既朋友報平安，
但係最後都係消聲匿跡。

兩個人都係不約而同係西貢行山，
大家都成班人咁行山，最後都係失踪左。
佢地失踪前打果個電話有乜意思呢？

颱風龍王.

前幾日打左個風叫龍王，
聽電視新聞報導話龍王係台灣，
等我以為白龍王去鬼左台灣做親善訪問添。

呢個風既破壞力都好勁，
成個台灣都吹到散左。

所以話唔怕生壞命，
最怕改錯名，下次都係改收皮或者毛毛蟲會好D。

童夢奇緣.

今日同阿豬媽去左睇劉華既童夢奇緣，
講既係親情、友情、愛情同埋珍惜眼前人等老新常談。
整部戲既戲路顯淺易明，但係深度十足，
能夠觸動觀眾既心靈。

或者大家都會好似戲中既主角一樣，逃避現實、杯葛父母。
或者大家都知道溝通係解決誤會既靈葯。
但係大家都有過有口難言，有苦自己知既經驗。

每個人都有一個腦子，
每個人都有自己一套既思想行為，
人與人之間其實會產生左無數咁多樣思想行為，
你點睇佢，佢點睇我，我點睇你已經係可以好複雜，
何況我地活係幾十億人既社會呢。

沒有一本通書，沒有一竹筏，過自己認為快樂的人生吧。

艾雲請食飯.

今日好鬆D艾雲請食飯，
約埋家姐細珮就去左銅記既板前壽司食野。

唔知係咪小小感冒既關係，
個人好似提不起勁咁，食乜都冇乜味。

但係同佢地吹下水咁又過左兩個鐘，
話晒都好耐冇見呢。

多謝晒艾雲先！

休息一天.

休息一天。

與會人士.

今日同柏納敏姐一齊落Card Centre開會，
又再一次參加呢D誇部門會議，心情難免有D緊張。

如常地我都係扮演著與會人士，
即係得個聽字，盡量吸收一下人地既意見，
同埋見下呢D場合咁樣。

最後個會開左個半鐘頭，我又可以找回自我了。

再訪月球.

聽講美國有新既登月計劃，
重話有一個電梯咁既火箭載人去月球旅行。

咁中秋節應該好多人幫襯呢。

魚缸近況.

孔雀魚比人取締了。

報憂不報喜.

世界上總有人唯恐天下不亂，喜歡報憂不報喜。
電台節目話香港既報章雜誌喜歡報憂不報喜，
好似迪士尼既醜聞，某某影星既惡行等等。
或者要等到所有野消失，大家先會發現果樣野好既一面，
假使一日迪使尼搬走，大家就會話佢點好點靚唔捨得；
假使某某歌星離世，大家就會話佢人靚歌甜唔捨得。
呢個現今香港社會既一種風氣，也是今天香港既成就吧！

報憂不報喜植在每一個香港人既心中，
若有同事大大聲話邊度邊度錯，
又驚死人唔知咁話邊度邊度唔岩，
你應該用正面既態度回應佢，若果真係做錯就要一齊糾正番，
若果冇人做錯就詳細研究大家既諗法，
以平常心看待報憂不報喜吧。

三十小時的三號風球.

今年夏天奇特地冇打過一次風，
但係都係成日陰陰天，落下雨咁。

中秋之後，一反常態地走左個風黎香港，
不過係一個蝸牛風，因為行得好慢。

天文台掛左一個日幾既三號強風信號，
天氣時好時壞，一時好好天，一時橫風橫雨，
個風勁起上黎真係連樹幹都吹斷。

每當有大風既時候，我都會諗下美國果個超級颶風，
我地呢度小小地既一個三號風球都吹到咁，
比個超級颶風我地咪渣都冇……

全日有休.

~今天休息~

阿婆生日.

今日係Card Team阿和生日，生日快樂！

安拉大戰.

去旅行之前已經開始做緊一個新Online Program，
呢個Program係Merchant System入面既其中一員。

做親呢D Program都係做加刪改查四個功能，
雖然之前又累積左小小安拉程式既經驗，
但係一次過做咁多個功能，重要全部係自己諗晒都係第一次。

我就唔鐘意諗好晒成個Flow先著手，
我果種係一路做一路諗，有好冇唔好啦。

攪左個多星期，加既功能終於做好，
真係覺得有小小成功感，哈哈！

累慘了.

琴日夜機番到香港，
番到屋企又要執番好D行李，
攪到夜一夜先訓覺。

今日就要番工，真係攰到灘係度咁滯……

台灣電波一番 Day 4.

事件一：打書釘
第四日完成最後既行程，
我地去左誠品打書釘，打左一個早上。
台灣人真係好鐘意睇書，坐晒係度睇，真係西厲。
揀左幾本好書就離開了。



事件二：搬樓梯
食完午飯就要出發去機場，
我地兩個笨瓜唔知酒店果度有車坐去機場，
預左要走番去台北車站搭國光機場巴士。
去到台北車站雖然好快咁搵到巴士站出口，
但係居然冇Lift搭！
我地死死氣咁搬果舊行李上樓梯，滿有電波少年既精神。
如果第一日唔係叻得滯買巴士來回票，我地就輕鬆得多呢。

事件三：回程小事
回程果事終於記得問有冇窗口位，
但係果個地勤話位置一早安排好，
重要兩個位係隔開左，真係黑仔。
上到機原來我地只不過係中間隔左一個人，
所以我就咁問佢：
我：先生，不好意思。
我們一個坐這裡，一個坐這裡，(用手指坐我地分開既兩個位)，
你可不可以和我們調位(普通話應該唔係講'調位'，哈哈) 呢？
先生一：你們想怎樣坐？
我：喔，我們坐這邊就可以喇。
最後我地都可以一齊坐，有驚冇險，完成旅程。

台灣電波一番 Day 3.

事件一：世界真細小
第三日早上就去蔣公既地盤 — 中正紀念堂。
去到見到好多白色衫既台灣人，
佢地係度舞龍舞獅，原來係國慶采排。
我同阿豬媽係度影影下相，無端端有人用廣東話叫我，
原來係大學同學，真係世界真細小，他鄉遇友人。
最後一齊影左幾張相就繼續行程。



事件二：等食一小時
下午去左台灣好出名既鼎泰豐。
咁岩果班同學又係去鼎泰豐食，
但係我地去到佢地已經有得食Lu。
接待小姐話要等五十分鐘，最後我地都等左成個鐘先有得食，
不過佢果度既小籠飽真係好好味，等都底。



事件三：等食半小時
食完午飯就入左天母區，去Haagen-Dazs食雪榚。
呢間Haagen-Dazs裝修到成間雪樣屋咁，
但係果個咁既肥仔侍應累我地白等左半個鐘，
因為佢唔記得落單，真係激到爆！
後來黎左個火陷雪山又好睇唔好食，
呢個行程都算係最唔滿意既一個。



事件四：榴槤在摩天輪
黃昏去台灣最大既摩天輪，位於美麗華百樂園。
我地坐摩天輪坐得比較特別，因為我地冇欣賞到風景，
剩係好忙咁係度影相，走黎走去，好驚險呢。



事件五：夜市走一遍
晚上到左全台灣最大既夜市 — 士林夜市。
我地周圍行下食下咁，而今晚最大既目的就係要食雪片。
果間雪片係阿豬媽上次黎台灣食過，
所以今次帶埋我去試下，但係搵左好耐都搵唔到，
正當要放棄之際，果間野無端端出現左，
皇天不負有心人，真係好彩！

台灣電波一番 Day 2.

事件一：住大房
第二天我地要搬酒店，係北投玩左一朝之後就出番市區，
奔波一輪之後就到左西門町既東龍大飯店。
諗住三點先有得Check In，咁寄住D行李係酒店，
點知阿姐話可以即刻Check In，仲話比間大房我地添，
呢個都算係今次行情既一大收穫。



事件二：一碟貴鴨
係酒店抖左一陣間就開始第二天下午既行程。
我地首先跟住本旅遊書係西門町食野，
去到一間叫做鴨X扁食下鵝咁。
入到去有一個不太又善既小姐問我地食麵定米粉，
我地就每樣要一碗，跟住又問我地四分一隻鵝夠唔夠，
我地梗係話夠啦。
最後黎左一碟大大碟既鵝，睇黎睇去都唔只四分一，
都有半隻咁大，我地都開始擔心食唔食得晒。
最後真係比佢搵左笨，果隻鵝成三百蚊新台幣，
即係成八十蚊港幣，真係無奈。

事件三：101接駁車
食完貴鴨之後就要去景點台北101大樓。
路線係搭完捷運再轉免費既接駁巴士，
去到捷運出口，唔知個巴士站係邊，
見到有一渣人係度等車，於是我地走過去望下，
望望下又見唔到果個巴士站喎，
但係就見到架接駁巴士泊左係後面。
又走過去係佢隔離等，
等等下又聽到人地問路話去番我地頭先望望下果度等，
我地又跟住人地行番轉頭。
行黎行去一輪之後都上到車，真係烏龍。



事件四：走訪夜市
係101果度留左成個黃昏之後，
就要我地今次行程最難搵既一個地方 — 饒河街夜市。
係捷運站搵左一個揹Gucci手袋既女仔問路，
點知問錯人，原來佢都唔識路，哈哈，
佢照住本旅遊書上面咁教我地去，真係 'Com沙' 佢先。
最後落左捷運入面問果個票務員，
佢好不耐煩咁畫左條路線比我地，跟住佢行左半粒鐘先到呢。




事件五：亂闖火車
行完夜市之後，我地冇番轉頭擭搭捷運，走左去挑戰搭下火車咁。
台灣既火車好似我地既直通車咁，都係去好遠既地方，
但係都會有好多個停車站。
我地其實係要係松山車站番去台北車站，都係搭一個站咁多。
但係又唔識買票，問果個票務員又唔知佢講乜，
最後見到有個牌寫住下一班住高雄既列車幾點到，
同埋係邊一號列車，我地就有理冇理買左票先，
驚會Miss左呢一班車之後要等好耐。
買完票之後入閘，見到一個少女係度跑去月台，
咁我地就跟住佢跑，以為架車就離走，
最後發現車都未離，都唔知跑乜，真係亂晒籠，哈哈。

Com沙 = 台灣語：多謝 (我諗^^")



事件六：English Teacher?
成功搭完火車之後，我地就係台北車站入影下相咁，
影影下果個閘口護衛同我地講野，
開頭以為佢唔比我地影相，後來又以為佢幫我地兩個影，
最後先知佢要我地企埋去同佢影……真係騎呢。
同佢影完須便問下路，佢唔知做乜係咁講英文，
我就係咁講普通話喎，無端端雞同鴨講，攪晒事咁。
最後我話佢D英文講得好好，佢話自己係 English Teacher，
真係比佢笑死。

台灣電波一番 Day 1.

事件一：行山搵酒店
第一晚住既酒店係北投區，位於台北既郊區。
由於冇酒店接駁車既關係，所以我地就由機場坐巴士去台北市區，
再坐捷運去北投。

Travel Agent話由捷運站行去我地間酒店只有十分鐘路程，
所以我地就冇打的，就咁行路去。
點知拖住個喼行下行下，都唔知行左去邊，
剩係見到前面條路係咁上山，行到身水身汗。
行左大半個北投，上山落山再上山之後，終於到左。
後尾有兩大發現，
就係可以係捷運站打去酒店叫車出黎接我地，
同埋我地行錯左一條山路。唉……



事件二：遇到靚仔服務生
去到酒店，有個靚仔Bell Boy帶我地去房間，
我用我平生最勁既普通話同佢講野，
但係佢剩係係度笑，真係冇計，講得太好。
最後都係由阿豬媽同佢講，我都係抖下算喇。



事件三：訓生保床
唔知間酒店做乜，成晚都好嘈，有D支支聲，
加上開左冷氣都好熱，所以成晚都訓得唔係咁好。
雖然行到隻腳好攰，但係都唔可以一覺訓到大天光，
真係一大苦事。

經營幸福.

若你此刻已有一位長久相伴的伴侶，
不要再隨便三心二意地猶疑了。
我們往往不易覺感情中的一個陷阱，就是「近親生慢侮」，
也就是經濟學中的鐵律「邊際效益遞減法則」。
跟你在一起越久的人，就越容易麻木與忽視，
而新鮮的「際遇」總是那麼動可愛。

在感情對待中，難免有摩擦與無心的傷害，
而且論得罪自己的次數累加起來最多的人，
當然是跟我們在一起最久、最親的人；
而新歡呢，又還沒開始有得罪你的機會，
再加上他的刻意討好，所以新歡怎麼看怎麼可愛，
舊愛怎麼看怎麼討厭。

但別忘了，新歡身上總是有不確定的未知數，
舊愛身上就是有難得的熟悉感、確定感、賴感。
萬不要隨便在偶然的「際遇」中迷失了自己，
錯放了幸福溫暖的手。

放心晒.

今日打電話去果間Travel Agent度問下有機票拎未，
佢就話今日三點後就可以去拎。

放左工搵埋阿豬媽就走上去拎，
最後都成功咁拎左幾張A4紙，
一張係電子機票，
另外兩張係訂酒店既Receipt。

都總算鬆左半口氣。

好醜命生成.

6號
個性溫和而且穩重。
最大的特色就是不論對任何人，都可以表現得既親切又寬大。

18號
性格非常極端，
不是意志堅定勇往直前；就是感情用事隨波逐流。

敏姐回歸,

經過兩星期既磨練，
終於等到敏姐番黎重整我地BS既業務。

好彩呢兩個星期都冇乜大野發生左，
真係要感謝上天。

電腦炸彈.

曾經睇過一本雜誌，
話帶來世界未日既人會係比爾蓋茨 Bill Gates。
因為係今時今日既電腦年代，好多電腦都係用Bill Gates既產品，
以Microsoft為名既軟件應用率超過八成，
加上互聯網既應用，蓋茨可以視為控制全世界既人。
只要蓋茨稍為更改一下佢既軟件系統程式，
影響既人可以係數以億甚至百億計。

今日我無端端有一個好古怪既諗法 —
其實全地球咁多部電腦都可以係一個小炸彈，
因為佢地都係硬磞磞既機器，只要係過熱，
佢地就會產生短路，引係火警甚至爆炸。
一個小小既家庭都至少有一至兩台電腦，
一座大廈有咁多戶，都成幾百台電腦，
全部一齊爆炸，威力的確難以想像。

電腦過熱大家都試過，輕則當機，重則產生異味。
蓋茨只要係佢既軟件入面加入一個令電腦快速過熱既式，
並預準在一個特定既時間執行，地球就會……

善惡到頭.

職場如戰場，好多野唔係你打人就人打你。
個個都話只要做好自己本份，
就會百毒不侵，唔洗驚人地對自己既攻擊。

要做好自己既本份話易唔易，話難唔難，
當你做錯野，要保護自己果陣，
你可以決定勇於承擔，或者諗盡辦法推御責任。

我覺得做人做事要心安理得，就要負責任。
做出推御責任既事之後，就要驚有人查出真相，
後果可能比勇於承擔嚴重得多。

後生仔，人生漫漫，何必給自己不必要既污點呢。

格七.

今晚落左街打波，由於肥哥要番工，
所以我就自己行過去跟住隊等。

本身自己老晒都唔係好掂，
加上幾個禮拜都冇打到，所以都Keep住咁渣，哈哈！

跟住有一個人稱甲一既黎左，
睇佢個樣又真係幾嚇到人，又高又大隻。

但係後尾打落先知佢真係得個樣，
所以我地幫佢起左個名叫格七，即係將甲一讀丕小小。

數獨.

呢一兩日迷上左數獨遊戲……

數獨（日語：数独　すうどく）是一種源自18世紀末的瑞士，
後在美國發展、並在日本得以發揚光大的數學智力拼圖遊戲。

拼圖是九宮格（即3格寬×3格高）的正方形狀，每一格又細分為一個九宮格。
在每一個小九宮格中，分別填上1至9的數字，
讓整個大九宮格每一列、每一行的數字都不重複。

數獨的玩法邏輯簡單，數字排列方式千變萬化。
不少教育者認為數獨是鍛鍊腦筋的好方法。

能化阿媽.

今日阿媽打黎問表哥手機幾多號，
我就係我部好勁既O2 Mini搵下啦。

見到有個叫'阿傑'既電話，
跟住諗到冇諗就話左比我阿媽知。

過左一陣之後，有個同事話岩岩有人打比佢九唔搭八，
又話自己係佢阿姨、又問我個同事係咪姓古，
最後就話佢打錯電話收左線。

我聽完之後即刻睇番頭部O2 Mini
先知我頭先講錯左電話比我阿媽知，哈哈！

我個同事又係叫阿傑，同我表哥一樣，
今次真係能化左我阿媽呢。

貴魚.

今日去左金魚街買魚，為我屋企個魚缸添新成員，
今次Target係買紅色既孔雀魚毑。

搵到一間買$8一條，於是係門口睇下。
但係發覺雖然佢係有紅色，但係就冇毑。
問阿姐有冇紅色孔雀魚毑，佢就叫我地入去入面揀。

原來入面果D係$38一對，成廿蚊條！
人地出面$20袋都有成五六條，家陣廿蚊得一條，
但係見到都幾靚就買左落黎。

希望呢兩條魚唔好咁快死啦。

黑仔.

今日我同安尼沙迫住要上廿二樓禁地整野，
因為果個Download File失敗左好幾次。

我地諗住放左工先上去冇問題啦，
又得到禁地管理人既批准。
咁就膽粗粗上左去，點知架Lift一開門，
見到渣緊Lift果個居然係最唔想見到果個人……

入左Lift之後，我猶豫左十秒禁唔禁廿二樓好，
但係最後都係禁左。

出Lift果陣我就行先，安尼沙就比人問做乜走上黎，
因為佢多次提醒我地唔可以上黎。
安尼沙向佢解釋，佢聽聽下閂左個Lift門走左。

咁都撞到，真係唔知好彩定唔好彩。

迪士尼 Stress Test.

Stress Test — 壓迫測試

Stress Test 應用係好多地方，

例如數碼相機出廠之前會有一個測試係不停咁影相，

影夠唔知幾多百萬張咁，保證佢通過測試。

又例如去黃金砌機，佢可以幫你煲機，即係廿四小時咁開住，

同埋係咁行一D測試用既Software，以求穩定性。

所有Product都要通過Stress Test先可以叫做信得過，

所以我覺得我地香港既迪士尼都唔例外。

為左達到目的，香港政府就藉口攪一個公益日，

吸引大批市民試玩迪士尼，另到迪士尼既容納人數去到上限做Stress Test。

結果琴日有三萬人迫爆左迪士尼，

阿姐話： 重慘過輪米……

(以上理論純屬個人觀點)

剪髮.

今日黃昏同阿豬媽一齊去剪頭髮。
今次都係去番上次剪得唔係咁好果度剪，
因為發現左D頭髮長番之後又 OK 好睇，
所以做人應該唔好咁眼淺。

剪完之後比錢，兩個人夾埋收左 $196。
行左出問口先發現佢原來加左價，
因為平時剪開都係 $88 一個人，
被人收多左 $10 都唔知呢。

突如其來.

好多事都會突如其來 —
海嘯突如其來、
地震突如其來、
頭獎突如其來……

有些突如其來會拎人傷心，有些就會拎人開心。
但係突如其來既野都有一個共通點，
就係會拎人一時間接受唔到，結果情緒失控。

既然突如其來既野唔係我地既控制之內，
妳也不用唔開心呢。

9月1日,

九月一日對於一個學生哥黎講都算係一個大日子，
因為多數佢地都會係呢日放完暑假番學。

大家都諗近會唔會有新班主任、
自己會坐係邊個位果度、
PE 堂係禮拜幾上，會唔會係放學之前上呢……

但係人大了，九月一日變得越來越沒意義。
上左大學，開學同未開都係差唔多，都係好似放緊假咁。
大學畢業，出黎做野之後，九月一日完全沒有意義，
只不過是一個要番工既日子。

我想要到有了孩子之後，九月一日才會有另一番意義呢。

請大家小心您們的信用咭！.

當您在商店時，需小心附近拿著手提電話的人，
他們將您的信用咭影像拍下。

上面有您的全稱、號碼、失效日期等資料，
他們便能盜用您的信用咭。

因近日好多信用咭公司稱，
這一類盜取資料而導致客戶損失有急劇上升的趨勢。
請大家特別小心，並通知您身邊的親朋好友。

八達通.

User今日問有關八達通既野，
咁岩敏姐又放左大假，我地就得番三個臭皮匠。

雖然我都有小小八達通救亡既經驗，
但係講緊真係小小果隻。

之後加入左阿傑一齊研究，
但係都係多左一個勁D既皮匠，哈哈！
之後我用左半日番轉個八達通System都係得小小頭緒……

呢個八達通System最熟黎講都係Meiling師傅，
但係果時佢又冇乜教到我地喎，所以唯有自己領悟一下啦。

相簿.

我地部門呢期都忙緊搬'奧艾斯'，
由三九零搬到去Eject OS (阿強音)。

我都效法呢個搬遷既熱潮，
將我個Online Album由 Yahoo 轉左去 Sony 果度。

雖然兩邊都有無限儲存空間，
但係我都係覺得Sony果個好用D，
無論個Web Style同埋果D upload software都好好。

呢個Blog右下方既 My Photo Album就去到我果個新相簿。

冥婚.

冥婚、死婚。訂親後方亡故的，
擇日由童男童女抱牌位成親，婚禮後移棺合葬。

女方亡故，男方將牌位抬回家，另娶妻仍叫“填房”。
男方亡故，女方與男方的牌位拜堂，與木主共寢;，從一而終。

看這個結婚照：女的只有一只手,而且眼睛是往上看的,還在流血，
腳是掂起來的，沒有著地。
整個人是用木頭撐起來的！
其實那個女的已經死了，這就是所謂的冥婚 。
左邊那個女是個女屍雙眼還流出屍血。都想唔到佢地點行房！好恐怖！

(由於結婚照太恐怖，所以最後都冇貼係呢度。

有興趣可留下Email，我email比大家^^")

遊戲日.

今日由於我地部藍機'蕉'(Drill)左黎扮紅機，
所以就攪左個講座比我地Department上下咁。

講座內容包括銀行史、溝通技巧同埋銀行產品介紹。
去到溝通技巧環節，我地就玩左一個遊戲 —
我地帶晒眼罩，跟住每人派左一舊文具，
主持人話我地只可以問佢一個問題，
就係我地手上果件文具係乜野顏色，
之後就要搵番唔見左個兩件文具。

我地挖晒頭都唔知佢講乜，跟住大家開始你一言我一語，
又話報下數，又話每人都形容下自己果舊既形狀。
呢個時候我又黎攪笑，
我話不如大家聽完人地既形容之後，
覺得自己果舊同人地果舊一樣既話就舉手啦。

大家即刻笑到番肚，因為帶晒眼罩點知邊個舉手呢……

時間觀念.

時間等如第四度空間 — 點、線、立體、時間。
時間係好抽象既野，佢可以拎你有無限既想像空間。

曾經睇過一本書，
佢話如果你以光速係太空飛行，
你番返地球果陣，你既親人已經老晒，
你個仔可能會大過你，甚至你個孫女都老過你。
你已經去左未來，你知到你將會有一個孫女。

因為在宇宙間，光是速度最快的，
每秒鐘差不多可以跑三十萬公里，
秒針「答 」的一聲，光已繞地球跑了七圈半了。
即係地球過左七日半了。

所以以光速係太空飛行飛行一秒，
地球就過左七日，即係604800秒。
飛六十秒，地球就過左七十日，即係6048000秒。
從以上既推輪，太空時間可以係地球時間既604800之一。

時間可以用地球公轉同自轉黎定義，
但係飛左上太空，時間又有另一種定義，
因為你唔再係地球，唔可以用地球定義時間既方法。

時間？

高見.

經驗多既人多D人工真係冇錯！

實例 1：
有一個客人既月結單印衰左，我要提議點樣印番。
我即時就係諗到搵番以前既資料印番，但係會費時失事。
高層就提議User幫個客入機印番張月結單，
咁我地就乜都唔使做就可以印番佢。

實例 2：
User話今日印出一批信，但係手續既關係，
要做好多野先可以達到目的，但係就冇時間。
高層就提議問User係咪一定要今日印好，
改期會有多D時間準備。

以上事件既解決方法並唔係我第一時間會諗到，
呢D就係 — 經驗。

見紅.

今日Lunch食飽飯就抖一抖，
拎個Monchhichi枕頭出黎訓下咁，
一路聽歌一路訓，一陣間就訓著左Lu。

訓訓下個鼻痕痕地，於是就細細力咁'伸'下佢啦。
點知一'伸'就伸左兩pat血出黎，整左落個枕頭度。
我即刻彈起左，以為留鼻血就用左紙巾襟住佢啦。

點知又唔係係咁流出黎果隻喎，
原來係乾燥得滯，個鼻入面損晒，所以先會流血。

流左十分鐘到就冇再流，
但係就結晒焦，好似鼻屎咁黐晒係個鼻入面，
又唔整得走，唉……

擔心.

今日同D同事傾開話荷李活果度既Travel Agent全部都係黑店，
真係比我估中左，之前果場真係一場大戲，
不過最拎我擔心既係唔知會唔會拎唔到機票同Book唔到酒店。

因為聽番同事講佢地通常都係買完Package一兩日之後就有機票拎。
我買既係Group Ticket，所以就要等到出發前一日先有得拎。
加上又冇得查有冇幫我留左機位，真係勁無奈。

大家都話唔使咁擔心，應該都去得成既，唔會真係咁恐怖。

承大家貴言啦！

Goose.

今日學左一個英文生字 - Goose。
可能好多小學生都識呢個字，
原來係鵝咁解。

所以McMug入面果隻菇時原來唔係雞仔，
唔係鴨仔，而係一隻鵝黎架。

休息日.

前果幾個星期日都好似唔知去左邊咁，
難得今日可以得閒D，點都要抖番下先。

訓到唔知醒之後，再慢慢咁行落街食個野，
食完就繼續編排行程。

輕鬆咁過左一個星期日。

安排行程.

今日放左工就同阿豬媽安排一下我地去台灣既行程。

佢既目標係食買之行，而我又鐘意文化之旅喎，
於是大家就產生左小小既意見不合。

經過一輪既討論之後，終於可以搵到一個平衡，
滿足晒三個願望。

原來安排幾日既活動真係唔係咁簡單，
又要諗時間，又要諗路線，真係煩得很。

希望今次可以順利完成行程啦，哈哈！

連日大雨.

真係不得了，
落足成個星期雨，真真正正的冇停過。

有D地方重有洪水出現，
洪水連同垃圾雜物係山上邊沿斜路衝落黎，
場面驚人。

番工放工都落超大雨，
有遮都冇用，都係成條褲濕晒，對鞋又入晒水咁……

不過，呢個都係香港夏天應有既現象，
有總好過冇呢。

新魚缸.

自從上次拎左個魚缸仔番屋企之後，
阿哥就好想買一個大既魚缸，
實現佢多年既夢想。

今日Lunch同佢去左金魚街買魚缸，
行晒成條金魚街之後，
最後就買左一個18吋既大魚缸，
再買左三袋孔雀魚之後就番屋企Lu。

希望佢唔會三分鐘熱度啦。

搵錢手法.

今日去左旺角荷李活商業大廈六樓
果間卓越旅遊訂去台灣既Package。

因為呢間野個價最平，又見到果個Consultant幾老實咁，
於是就坐底搞手續。

本身我地Expect個價錢係$1750，
四日三夜，搭長榮，兩晚台北，一晚北投咁。
之後果個Consultant係咁打比佢D代理問，
跟住話我地出發果幾日好旺，冇晒機位，
可唔可以改出發日期，或者坐其他航空公司。
我地已經話左唔坐中華，所以就叫佢諗諗計，
佢又係咁打電話，港龍又冇位，
國泰時間又唔係咁好，攪左一輪。

之後佢就話重有一個方法，
就係Book旅行團果D散位，但係就會貴好多。
比佢攪左一輪之後令我地覺得錢唔係問題，最梗要有得去玩。
最後每人加多$600，成個Package冇變。

落左訂之後，我就覺得好似比人禁水魚咁，
都唔知係真冇位定係做左場大戲。

呢D假期去旅行都係早D報名，唔會被人昆呢。

放下大石.

班師回朝之後，
各人都忙於收拾自己既城池，氣氛良好。

由於煙達尼不能用既關係，
我軍一路有傾有講，一路收拾城池，
咁就攪左一朝，哈哈。

趁時機成熟，我鼓起勇起，向大將軍告假還鄉兩日。
最後都成功批左我既假期，
真係放下心頭大石，之前成個禮拜既憂慮一掃而空了。

班師回朝.

二零零五年七月二日，
我Team大軍大舉遷入23樓，
進行左一次伴君如胖虎的征戰。

經過六個星期既長期戰鬥，
繼有Call Center門戶之見，
冷氣風口臭味滋擾，
放工搵門鎖事件之後，
我軍完成這次歷史任務，
擇日二零零五年八月十五日班師回朝。

返回首都17樓之後，
進入新成池，養精蓄銳吧。

黑仔.

今日去左拜老豆，拜左咁多年，
果D 過程步驟都做到熟晒。

但係黑開有條路，今日落雨兼大風，
大風吹起晒D煙灰，攪到成身污漕晒。
不過呢樣都冇乜緊要，
最衰係化寶果時唔小心撩左人地果D寶落地，
塞自己果包入去果時又跌番出黎，重要燒著左……
最後唯有係地下燒左佢。

阿媽話跌左出黎都好，唔洗同人撈亂，
又話無端端有一陣風捲晒D灰上天，話我老豆收野喎。
咁邪？

新波鞋.

終於買到新波鞋喇，哈哈！
之前一係唔得閒，一係唔岩款，今日睇中就即刻買左。

重拾自信吧!.ok

經過幾日既瀟滌，明天又有一堆Program出街。
今日盡最後機會，試多幾次D Program ，盡量唔好錯。
顧自己之餘再顧埋人地，希望大家都唔好好似自己咁啦。

朝早敏姐話我知D Statement印得怪怪地，
我心諗唔係咁邪呀，一波未不一波又起！
經過調查後，應該係果個Printer既Feeder問題。
但係報告Statement有問題果位同事又覺得唔係Printer問題喎，
由於呢期心情唔係咁好，就用左D比較惡既語氣同佢理論，
最後就由泉哥證實係Printer既問題。

希望果位同事冇介意到我既態度啦。

阿滴作品.

(Ref Link: http://www.fotop.net/sakura100)

走在最前錢的Programmer.ok

琴日出事之後，
番工就成日提心吊膽，唔知會發生咩事。

不過除左琴日柏納話左我兩句之外，
其他關於呢單野既事都冇再同我講。

但係我都偷聽到佢地點樣搞番掂呢件事，好似搞到好麻煩。
成日見到柏納係咁行黎行去，又好似搞到其他系統要幫手，
又要伊梵同阿強幫手補救……
自己坐係到，見到人地因為自己做多左咁多野，真係好後悔！
再令我唔開心係令到其他同事都比人話，真係好無奈。

如題，走在最前錢的Programmer，面對錢銀上的Program，壓力大矣。
但一個人要有壓力，才會認真，才會進步。

上天安排.ok

琴日問左柏納可唔可以係中秋節前請兩日假，
佢就話應該冇乜問題，但係就唔知大佬批唔批。
今日滿心歡起咁填晒Form，諗住做左年幾終於可以去玩下，
點知……

敏姐走埋黎，一臉無奈咁話有野錯左，
我開頭都不以為然，以為係小小事，
再睇多兩睇先知到原來係大野，
個Program重要係我寫，
自己即係爻晒底，等候審判吧……

(主因係自己唔小心，
但係主要導致我唔小心並唔係我自己唔小心，難言之隱矣。)

中秋台灣行.

經過多個月既籌備，
終於決定係中秋攪番個秋季大旅行，
目的地係台灣！

由於今次都係自由行，
四日三夜溫泉、觀光、購物團。

經過上次去澳門既教訓，
加上阿豬媽又去過一次台灣，
所以今次都由佢黎做導遊，
應該唔會迷路啦。

不過有我D國語包底，
一定可以去到目的地既，哈哈！

冷知識 — 手機收訊格數.

手機剩一格時不要使用！

大家都知道手機的電磁波一直是讓人擔心的問題。
手機的設計為了在收訊較差的地區，
仍能保有相當的通話品質，會加強手機的電磁波發射強度。
當收訊滿格與只剩一格時相比，發射強度竟然相差1000倍以上。

為了你的健康在使用手機之前建議你先檢查一下收訊格數，
發現手機的收訊強度只剩下一格的時候，
寧可掛斷不談或者是改用公用電話。
用免持聽筒也是個不錯的辦法！

林Sir Passing Out!.

今日係我大學裏面其中一個好兄弟學警出更！
亦都係我入左永隆之後第一個輪休日！
於是就咁岩咁Q出席林Sir既Passing Out Ceremony。

今朝本來約左艾雲同瑜珈六點係火車站一齊去，
點知唔知醒，艾雲打比我已經六點八。
結果佢地去先，我就趕緊追番佢地。

由於岩岩落完雨，好鬼悶熱，
八點去到等到八點九先開始，真係好似係度等緊明星咁。
後來見到佢地既步操，都覺得值番晒。

睇完個幾鐘後，就係PTS圍影下相咁，
又去左林Sir間房影，玩左一朝！

我覺得佢係我地班男仔最勁最Man既一個啦。

向林Sir致敬！

放假! 代價?.

明天就係我地公司實行輪休之後既第一個輪休日，
我就咁岩編左入去呢個大日子，正！

不過真係你睇我好我睇你好，
原來放假係要付出好大既代價。

由於番小一日工，
所以要係放假之前趕好晒D工作，
結果晚晚都要放遲一個鐘。

計番其實星期六放假都係平時OT既補償……

有前冇後，打死把就.

明天就要推出Open University呢個大project，
呢個Project由敏姐同我負責。

經過短短兩個星期，四個Cycle既UAT，
就要推出，我本人就覺得敷衍左D。
加上D User係出街之前一日都有野話要改，
改左之後就只有我自己做Unit Testing，UAT形同虛設。

但係我地呢D P仔有乜影響力呢，
明天就出街，有如赤裸裸上戰場，
有前冇後，打死把就……

唔底可憐.

旺角人來人旺既大街、天橋都會有好多乞兒。
有一D係殘廢、
有一D係年老、
有一D係賣藝……

但係有一D乞兒我就覺得佢地唔底可憐。
放工行過旺角上商成日見到一個阿伯，
放左張紙係到乞食，
張紙寫住患左肝癌，晚晚訓覺最辛苦。

我覺得呢個阿伯後生果時肯定又煙又酒，
結果攪到自己一身病痛，失去工作能力，係度乞食。
如果真係咁，佢真係唔底可憐 — 自作孽，不可活

冷知識 — 手機電池.

如何讓手機電池起死回生？
當你的行動電話電池使用時間變短(記憶效應或老化)時，
你是否會再買一顆電池來更換呢？
下次當你碰到這種情況時請省下你的錢，
告訴你一個很有效的方法不妨試試看：
(1) 把電池用報紙包起來再放進塑膠袋裹
包好放入冷凍庫三天(報紙可吸收多餘水份
(2)三天後取出常溫下放二天
(3)二天後將電池充電 , 充飽後裝進行動電話裡測試
(預估可救回80%-90%)

妳的手機是否常斷電？
或是明明充飽了電沒多久就又沒電了？
妳一定懷疑過是不是手機的壽命終了？
別擔心，它只是一時“心跳停止”，
只要一塊小小的橡皮擦就能起死回生了！
把電池取出後用橡皮擦把電池上的接點（黃銅片）擦乾淨，
再裝回手機。

倒王.

阿強不知不覺間已經成為我地Card Team既倒王，
所有大大小小既Restore都交比佢。

只要你話比佢聽時間同埋系統，
佢勁快就會倒到比你，真係勁！

我到今天都有倒野恐懼症，
一來要麻煩人，
二來次次都不能夠一次成功，
真係邪喔！

對不起.受苦了.

呢兩日假期雖然兩日都做不停，
但最受苦的不是自己，
而係阿豬媽，因為她悶左兩日……

對不起！
我會學曉打算了！

閒裏偷忙.

星期六本應是忙裏偷閒的日子，
但係我就要閒裏偷忙，真係無陰功。

沒事無聊時，
期待有意義的時間，
忙透半邊天，
期待著休息的日子。

能使人生充實而又活在當下，
是人生的一個考驗。

芝加哥千禧公園.

藝術既野，你識幾多？

太空船發現號.

話說太空船發現號發現機身出面有異物，
專家擔心太空船反回地球果時，
會因為呢個異物過熱而引致太空船空中解體，
所以發現號要泊係國際太空站作詳細檢查。

中央電視台就呢件事訪問左幾位前太空人，
亦都做左資料收集。

結果得到一個驚人發現：
係全世界未有太空船升空之前，太空船既失事率係一百萬份之一。
之後發生左一次空中解體，失事率得番一百分之一。
經過多年之後，現今既失事率係五十幾分之一。

即係升空五十次會有一次失事解體……

永隆老爆驚魂.

琴晚晚間新聞報導話永隆發生懷疑爆竊案，
搞到警方大為緊張。
今朝重上埋新聞頭版，但原來只係一場誤會。

【 本 報 訊 】 永 隆 銀 行 位 於 新 蒲 崗 崇 齡 街 的 分 行
昨 晚 發 生 一 宗 「 爆 竊 案 」 ， 該 銀 行 正 門 一 道 裝
有 警 報 系 統 的 電 動 鋼 閘 ， 在 夜 闌 人 靜 下 突 然 離
奇 彈 開 ， 而 銀 行 的 玻 璃 門 亦 「 中 門 大 開 」 ， 警
員 接 報 到 場 後 以 為 銀 行 遭 匪 徒 潛 入 爆 竊 ， 如 臨
大 敵 地 將 銀 行 包 圍 。 怎 料 ， 警 方 經 過 三 小 時 調
查 後 ， 竟 發 現 事 件 原 來 是 一 宗 「 機 件 故 障 」 ，
銀 行 的 電 閘 無 故 失 靈 導 致 彈 開 ， 而 銀 行 職 員 在
下 班 後 更 無 將 玻 璃 大 門 鎖 上 ， 導 致 銀 行 的 大 門
一 直 敞 開 ， 遂 引 來 這 場 罕 見 的 爆 竊 驚 魂 。

事後有記者深夜訪問我地既董事，佢既答覆係：一件小事。

45,000,000.

今晚係六合彩精彩30金多寶既大日子，
頭獎一注中可以獨得四千五百萬！

嘩！如果我個銀行結餘有八個位，
我真係可能會暈一暈低。

為左可以暈一暈，
我總供用左60蚊黎買起佢，
咁大個仔比得最多錢買六合彩既一次。

今次投注總額有一億幾，
即係大概有二千萬注，
假設人人好似我咁買六十蚊，
就有一百八十百萬人投注！

但係，咁都冇人中。
難過登天矣！

當興趣變成工作.

讀緊三年班既時候，
果D就業組導師就話要搵一份好前途、自己又有興趣既工作。
佢地話錢唔係最重要考慮既因素。

我果時都好認同佢地既講法，
覺得搵到自己既興趣，做乜都咁開心。

日月如稜，我終於發覺左，呢個係一個天真既諗法。
若果工作係自己既興趣，就符合左就業組導師既假設，
但當你自己既興趣變成左工作，日對夜對、日做夜做，
你就唔會對呢個興趣產生興趣，反之，你會覺得係一種負擔、一種壓力。

每日為興趣而工作，是找尋樂趣，還是負上責任呢？
興趣本應係開開心心、隨心所欲，
當有工作限制左你既興趣既時候，興趣就會變成工作了。

恐龍化石展.

琴晚迫完書展之後，
今日又走左去迫太古城恐龍展，行程真係緊密。

不過呢個恐龍展都開放左成個月，
接近尾聲，所以都比之前少人左好多。

全個展覽總共有八條巨龍化石，有大有細，
重有一D遠古植物同恐龍蛋既化石。



除左最大最高果條天府峨眉龍之外，
其他既龍都唔係咁吸引，重有D假既感覺，
因為佢地實在係太完整。

逗留左個幾鐘，同D小朋友迫完之後，就離開Lu。

書展.

又係一年一度書展既時候，
回想係中學年代，我係唔會去呢D展覽，
因為我都唔鐘意睇書，寧願打下波好過。

但係自從二年班同阿豬媽去完之後，
就年年都有出席呢個萬人空巷既活動。
而自己都培養左小小睇書既興趣，
但係都係睇果D鬼鬼怪怪既書，哈哈！

去親書展都好鬼勞氣，因為實在太多人，
係咁迫係咁迫，最憎就係呢隻氣氛，
不過大部份人都好有禮貌既，唔係真係會打交！

今年最慶唔係行書展果陣，
而係行完之後人潮散退果陣時。

真係唔知會展果班食蕉食乜大，
完全唔識用腦，唔識變通。
首先，大家通常都會以Hall 5為最後一個Hall，
咁都左十一點幾果陣，好多人係Hall 5果度走，
出口明明有四度門，果個咁既食蕉就開三度門入，
剩番一度門比人走。
十一點幾，開三度門比鬼入咩！
嘩，冇踩死人都叫好彩啦。

幾經辛苦出左個門口行去搭電梯，
諗住可以快快脆脆離開啦，點知又差D發生意外。
因為有太多人用同一部扶手電梯，
電梯出口變左樽頸位，D人係咁擁住又行唔到，
架電梯又係咁行，咁我同其他人咪係咁XX果個食蕉，
叫佢停在架電梯。佢剩係識企係度叫D人行前D、行前D，
行到先得架大哥，最後好彩上面冇人擁落黎，
大家慢慢咁行後先冇發生意外。
明知多人走就一早停左架電梯啦！

唉，嗌到我喉都沙！真係食蕉。

公司前後.

未裝修前...

新門口...

裝修臨近完工...

喜訊! 買三送一!.

有D同事等左幾年、
有D同事等左十年、
有D同事等左三十年……
大家都係度等緊 ' 星期六輪休 ' ！

今日，係歷史性既一日，
公司終於批左全行人都會有星期六輪休日。

雖然唔似得出面公司長短週，
又學唔到人地星期六唔使番工，
但係可以有長長長短週，都好開心啦！

睇黎公司出呢招黎收買人心，都好似好得播。

五千五百次雷擊.

外星人真係打到黎喇！

係史匹堡果套強戰世界入面，
開頭講地球好多地方都係咁閃電，
但係就冇行雷，大家都覺得好奇怪……
原來係外星人乘住閃電侵入地球。

今日早上至黃昏都好好天，
但係入黑之後，天氣突變，
落大雨之餘重不停咁閃電。

天文台就係夜晚十點至十二點兩個鐘頭內，
錄到超過五千五百次既雷擊！

嘩！三得個三、六得個六，
兩個鐘七千二百秒有五千五百次雷擊，
即係唔夠兩秒就有一次，好嚇人呀！

又趕.

唉，今日又要OT趕野，
無端端可以有五六野要做，
重要聽日就要做好，真係洗人唔洗本。

雖然唔係一D好難做既Program，
但係User咁既Planning真係令人失望。

其實咁講都比左面佢地，
衰D講句，我覺得佢地係冇Planning，
冇諗過D野就係咁話要做，成日就夜晚晚黎開會，
搞到好似好勤力咁。

但係我覺得，如果D Project可以Plan得好D既話，
大家都唔使咁辛苦 Lu。

皮蛋的歷史.

皮蛋有四名 —
南方稱它為彩蛋，北平稱它松花蛋，
外國人稱它千年蛋，西北稱它為泥蛋。

它是我國所發明，源於明清之間，長江流域一帶，
使用木灰、石灰、鹽等物醃漬過剩之鴨蛋，
以便長期貯存，漸傳至北方。
後來也有用雞蛋製造皮蛋，但因蛋黃易變形，
但而習慣上仍以鴨蛋為原料。

A、松花蛋小檔案：
因久置，蛋白部份有松葉似之針狀花紋而得名。
專家怎麼說：
因蛋白質分解成胺基酸後，在水分少，
北方氣溫較低下，
於是有了白色結晶形成因此有人稱它為乾酪氨酸之結晶。

B、塘心皮蛋小檔案：
專家怎麼說：
蛋黃受鹼作用，粘度高，蛋黃並不完全固化，
1/4～1/2保持糊狀，稱之塘心皮蛋。
鹼性更強或浸漬時間更久則蛋黃完全凝固，稱之硬皮蛋。

整電腦.

阿豬媽屋企部電腦上個星期壞左冇晒反應，
應該係火牛出左問題。

今日上去佢屋企整，
佢爸爸媽媽姐姐都係度，攪到我鬼咁緊張。

入屋打左招呼之後，就一副Pro樣咁係度整電腦。
試左Confirm係個火牛壞之後，
就同阿豬媽去深水步買番個新。

去到鴨寮街之後想買番個义電機，
於是行左好幾間格下價，街到身水身汗，
最後都搵到一間好底咁買左。

買埋火牛都天黑，食完晚飯就回家了。
忙了一天，很累耶。

打邊爐.

今日下午同阿豬媽買左兩樣電子產品比佢部O2 Mini用，
一樣係1GB既SD咭，另一樣就係藍芽Handfree。
番到屋企整一D Setting之後，
兩樣野都正常運作，真Lucky！

阿豬媽心血來潮想打下邊爐，
於是就諗住同埋阿媽一齊去買餸，
點知佢話買埋番黎，
咁我同阿豬媽就係屋企等食野。

雖然打邊爐既款式唔係好多，
但係基本既食物都有齊，算唔錯啦！

三偉飯局.

今日我同艾力終於等埋阿強做大個仔做既事 —
請食Team飯。

由於我地三個個名都有一個'偉'字，
所以是次事件史稱'三偉飯局'。

去左南北和食Lunch，
之前我地都去過果度食Team飯，
印象中好似食到好飽咁，
但係今次大家好似食得唔係咁飽，真係唔好意思呀。

例牌大家大刷一餐之後就食糖水，
都係例牌食楊支甘露，哈哈。
We Are Systematic Guys!!

我地三個人Share番都唔係好貴，
下次就輪到阿Jo同阿和喇，Yeah！

p.s. 師傅，我記得妳果餐架，Don't Worry!^^"

Dynamic Message.

Dynamic Message — 被譽為Statment Message最高境界
自從岩岩入Team果時個過一個簡單既Dynamic Message，
都好耐冇研究過呢樣野。

真係話佢蠢又唔係，話佢叻又唔得，
始終係土炮野，有好有唔好啦。

今次我要係呢個最高境界上再闖高鋒，
挑戰一條比較難同麻煩既Dynamic Message。

用左日半去做呢樣野，最後得左！
覺得自己好勁，哈哈！

Call Center.

時不時都收到一D電話打黎做Promotion，
覺得D人都係搵食姐，就好聲好氣咁拒絕左佢地。

上左黎23樓，坐係Call Center隔離，
日日都聽到佢地打比D街客做Promotion，
其中一個員工既工作態度，真係令人髮指。

佢同客講緊電話果陣不停咁做其他野，
剪下手指甲、睇下報紙、攪下其他野咁，
差未訓著果隻，一D都唔尊重。
有次收左線之後又係到鬧個客話：做死一世地盤啦你！
超，你自己咁樣做野，咪又係做死一世Customer Service。

高層唔係度就辦工時間走落街買雜誌零食咁，真係不知所謂。
攪到我覺得自己間公司Cheap晒…

螞蟻怕酸味? 蚊子怕辣味? 蟑螂怕香味?.

螞蟻怕酸味？
家裡的甜食擺沒幾分鐘，螞蟻大軍立即來襲，讓人又氣又厭！
獻給各位一項無毒無污染又安全有效的妙招 —
整粒的新鮮檸檬，對切成兩半，在看得到螞蟻的地方及其動線，
擠出檸檬汁，並拿著切半有果肉的那一面，沿途塗抹，
神奇效果讓您再一次驗證大自然的奧妙！

蚊子怕辣味？
將蒜頭置於蚊子出現的地方，其特殊的辛辣味隱隱飄散。
令人訝異的是，平日兇猛的蚊子不見了，
連下雨過後會出現的超大隻蚊子，也銷聲匿跡了！
所以，驅蚊除了打掃環境、清除枯枝爛葉，試植蒜頭絕對是上上之策！

蟑螂怕香味？
面對「打不死的蟑螂」，我的辦法是將一塊浴用香皂切成數小塊，
置於容器內注入清水，擺放在蟑螂出沒的櫥櫃內，不出數日，
打開櫥櫃將令您訝異於蟑螂的無影無蹤，櫥櫃內還多了怡人的香味。
想要效果持續，僅須定期補充香皂容器內的清水。

累透了.

經過上個星期既疲勞轟炸，
今日番工好似行屍走肉咁，冇晒精神。
唉，錢真係唔易搵。

星期一，一個禮拜既開始，
辛苦日子既開始。

詩偉語録 <鬼叫我窮呀頂硬上啦！>

半月灣.

今日天公做美，陽光普照，
我地大隊如常去半月灣游水。

本身諗住十二點出發，食埋個午餐，
兩點前就去到目的地。
點知等下呢個等下果個，
最後成三點先去到個度……

去到之後，又要用個細細既Pump去Pump琴日買果隻艇，
又要整把太陽傘，整完三點半終於落到水。

玩玩下唔見左謙哥，原來佢比D礁石割到隻腳指尾，
所以去左救傷站，Joyce重以為佢浸親，比佢嚇死。
之後輪住出海暢泳划艇，最遠去到防鯊網果頭，真係勁。

夜晚勁攰咁係西貢搵野食，
入左一間餐廳勁多人，
果個阿姐求其開左張枱比我地，又串住晒咁，
於是我地拉大隊走人，走果時肥健重搵果個經理投訴。

好彩最後都可以好好地咁食一餐。

火爆阿叔.

原定明天既沙灘活動如常舉行，
所以我同肥健今日就出去裝備一下。

我地去左旺角火車站花園街出口電梯下面，
果幾間玩具店買浮床。
睇睇下見到有浮艇買，重有埋杖送，都係百三蚊，
於是鐵定買呢款勁野。

同阿叔講價，話買艇送個Pump得唔得，阿叔就話送Pump唔送杖，
我同肥健即刻呆左，對杖唔係連埋一Pack架咩。
跟住肥健同佢再講，話百幾蚊隻艇咁貴，送個Pump都係好過份。
阿叔就話百幾蚊好貴咩，以前千幾蚊隻乜都冇。
跟住肥健又話有D買七十幾之麻，
阿叔又話五蚊一隻細細隻都有添。

係就黎講到打交之際，我地決定幫襯佢，
以免招玫血光之災。

如果唔係得佢果間有得買，真係費事采呢個阿叔。

上上上!.

今日點過？
百幾個Program，
幾十個Skeleton，
十幾個Copybook，
一日之內要Transfer晒。

本身諗住晨早番黎就開始呢個艱辛任務，
點知攪下呢樣，攪下果樣，
又比第二個Transfer先，最後成三點先開始，
心諗今晚冇七點都唔洗走。

結果聯同阿Jo同阿和，
係好唔順暢既情況下，
完成任務，完成時間係七點半。

跟住阿強又話漏左幾個未Transfer，
攪多兩攪就八點半Lu。

最後，我地同埋柏納好攪笑咁
搵23樓個門口鎖匙鎖門離開。
又話係22樓，又話係地下大堂，
最後原來係23樓門口Reception張枱度，
九點撒退。

今日兩大Gag：
艾力：阿Roy，你唔係宜家先寫Program呀？
柏納：(夜晚八點) 咦，阿Roy，乜你重係度既？

大考驗.

嘩！轉眼間又要上Cash Card喇。
為左明天大家會有一個比較順暢既Transfer過程，
我決定一如以往，攪一個Transfer List出黎，
希望幫到大家。

點知呢樣野看似容易，做起黎都幾麻煩，
因為唔只涉及到一個大Project，
重要有兩個小Project大集會咁。
D Documentation 唔係咁 Update，
整合係今次唯一既挑戰。

只怪自己一個人能力有限，最後個List都係做得唔好，
攪到大家做多左野，唉……

~ Lonewolf ~

Online Program.

自從上年7月Training之後，
我都未試過自己寫一個Online Program，
日子有功，開始對Online Prgoram好陌生。

為左公開大學呢個Project，
我又要面對自己最弱既一環，真係一個鍛鍊既機會。

但係今日攪左成日都唔係好掂，
總是力不從心，唯有向添尚宮請教。

世事豈能盡如人意呢。

不妙.

由於23之地既關係，
我地既魚就比左其他唔係23之地既伙計幫手照顧。
世事既野就係咁岩，
今日我地既助總落左17樓睇下裝修、巡視下業務咁。
佢行過果班伙計張枱，見到有幾個魚缸係枱頭，
霎時間回想起好耐之前架Lift有耳事件 。
(詳情見於星期四, 三月 03, 2005既日記)
之後同佢既下屬就此事交頭接耳……

今次唔知對漁業會有幾大影響力呢！

五分鐘早餐.

今日係搬左上23樓之後第一個工作天，
大家都唔知新既工作環境係好係壞，
於是都步步為營。

係公司食早餐呢D危險動作都係制唔過，
於是我就早D起身，諗住食埋先番工。

八點五去到大家樂，諗住重有三個字時間啦，
點知排隊拎野食用左個幾字，
結果用最快速度食完個早餐同飲晒杯凍飲……

搵食艱難矣。

TGI Friday's.

咁大個仔，終於知到乜野係貴夾唔飽！
今日同Ivan，Lawrence同阿鑫補祝番生日，
揀左去果間TGI Friday's鬼佬餐廳食野。

果間野同其他鬼佬餐廳一樣，黑麻麻咁，
燈都唔多盞，好鬼慳電。



D野食At least $60，
但係我覺得佢貴都冇所謂，貴得黎小！真係小一聲！
不過難得大家聚一聚，試一試D新野都好既。

七點幾食到十點幾，好似岩岩坐底咁，唉……

遷都咸陽.

經過個多月既準備，
今日我地Team終於遷都，
由17樓搬上23樓。



這被譽為高貴地方，
係我地眼中只是一個監獄，
更可形容為一個地獄。

坐又坐得唔舒服，食又冇啖好食，真係無奈。
最緊要係要改變番工習慣，成個朝早變到忙晒咁，
真係影響晒D生活規律。

兩個月的第一日……