強戰世界.

今日七一例牌冇去到遊行，
夜晚去左睇史匹堡今年既大作 — 強戰世界。

我個人黎講就覺得呢套戲唔錯，
首先有Tom Cruise呢個好戲之人，
我自己又鐘意睇D科幻題材，
加上D場景做得好足，冇話摭摭掩掩咁。
而呢套戲亦都好有感染力，
親情、無情之間既取捨。

但係都有彈既地方，
首先佢張個原著Cut到肢離破碎，
所以有好多地方都唔知佢做乜。
又有D地方唔合邏輯，比人覺得佢夾硬黎。
個結局埋尾好似求其左小小，
冇交代晒所有野就完左。

整體黎講有70分。

O2 Mini 毒.

自從買左O2 Mini之後，
我同阿豬媽都中左毒，上晒癮。
佢就鐘情於養魚大亨，日日係度玩下魚仔咁。
我就係咁試下D Software試下D新野咁，勁過癮。

好景不常，一機不能容二人，
結果我地就作出左重大決定 — 買多一部O2 Mini。

呢個決定好沉重，因為實左係太貴，
又驚部新機會有其他既毛病，攪到失望晒咁。
好彩，皇天不負有心人，
我地兩部機都冇乜問題，
最大既問題係我地有排玩，唔使訓 lu。

學以致用.

入左IT 呢行一年多，
對既都係一班 IT 人，
講緊唔係中文，唔係英文，而係Computing Language。

以前係學校曾經學過下Visio，
用黎畫D Flow Chart出黎比D User睇。
果時覺得好無聊，因為都比晒Requirements，
做乜鬼要張個Requirements再劃一次公仔黎交功課呢？
有冇果堆圖我都係咁寫個System架啦。

今日我終於明白，
原來一直我地都係生活係IT/IS既圈子，
大家寫既文字都係Computing Language，
所以劃圖會變左多此一舉。
若果由一個外行人寫Requirements，跟本就唔知佢寫乜。
你要自己分析完，加埋劃個flow比佢，先知到點著手寫個System。

呢D就係學以致用既時候。

投入工作.

接到一連串既新任務，
忽然間要理好多樣野，
真係覺得自已勁左少少。

不過我呢挺壯年癡呆症既人，
都唔知可唔可以記住咁多野，
真係一個大考驗！

不過諗番轉頭，又升你職又加你人工，
唔通唔洗你做咩。

都係果句 — 加把勁！伙記！

皮質醇.

壓力、腎上線皮質醇及免疫系統功能之關係：
1. 壓力出現
2. 腎上線皮質醇水平上升
3. 免疫系統受刺激而增加短暫免疫力
4. 免疫系統長期受刺激
(a) 免疫細胞死亡 -- 細胞自我死亡以防止『自相殘殺』 (增加感染疾病的機會) 或
(b) 免疫系統失調疾病 -- 過度活躍的免疫紐胞攻擊身體健康組識

笑下啦！香港人！

洗剪吹.

今日去左洗剪吹，
由於上次幫襯果間剪得都唔錯，
加上八十八蚊咁，
於是今日又走去幫襯多一次啦。

點知今次真係中晒計，
星期日，勁多人係度剪頭髮，
要等不特只，剪既時候又唔專心，
結果剪得唔係咁滿意……

剪到幾短咁，佢係咁問我係咪簿得滯，
我就係咁話唔緊要啦，夏天清爽D嘛！
但係心諗佢咁求其，唔係想剪得好下嘛……

不過最大問題都係星期日多人，
以後剪頭髮都係放左工夜晚去會好好多！

騙案.

有一位女性回家途中，經過幽暗的地方時，
突然跳出一個年約40歲，身高約155公分的男子。
他說他遇到搶匪以致雙 手及頸被綁，
他向我的朋友詢問警局的位置及要求協助解綁。

然而我的朋友基於現場 環境幽暗，附近沒有路人為由，
拒絕即時解綁，提議到大街後始解綁。
這男子聽後要求先鬆綁頸上的繩子，可是我的朋友再度拒絕，
這男子聽後便立刻循警局相反方向走去，說找別人替他解綁。

由於事件特殊，我的朋友決定報警，
警員解釋這些事件不是第 一次發生。
其實他並不是真的被綁，
他會待鬆綁之際伺機向女子非禮及打劫甚至強 姦，
故正當的做法應先報警及拒絕解綁…

一代新人.

係呢間公司一年時間，短得很，
但係離離合合、出出入入就時常都有。

今日又有一批應屆大學畢業生加入我地，
成為我地部門既一代新人，
亦都係我一年前既影子，
亦有一代新人勝舊人既氣氛！

加油吧！伙計！

O2 中文版.

上星期六買左O2 Mini之後，
個入完完全全入左Pocket PC既世界，
真係好多野玩好多野學。

今晚重比我玩到將我部英文版變做中文版，勁！
英文版平過中文版三百幾蚊，又比我慳左，HoHoHo！

但係聽人講中文版會比英文版冇咁穩定，
同埋中文版suppot軟件既能力較弱，
所以我買就買左英文版。

人就係咁，唔聽人講，我就要親身試一試佢！

一手交銀.

上星期交通銀行招股，我亦都獻出左我既第一次，
走去抽番幾手玩下咁。

同阿豬媽夾錢認購十手，一時之間冇左兩萬幾蚊，
真係風吹雞蛋殼、財散人安落。

諗住今次點都有千幾蚊執下啦，
點知前幾日話超額認購200倍！顛晒！

今日知道每10手就先會抽到1手……
真係無耐。

大雨成災.

香港雨季又黎左，
呢兩個禮拜係咁落雨冇停過，
又暴雨警告又雷暴警告，
日日天黑番工，天光放工，勁恐怖。

唉，日日都係咁，夏天就係咁嘥左……

蛹元再現.

呢期又回復真身，由毛毛蟲變番蠶蛹。
正如添尚官話齋，
大Project上前上後都係最蛹既Moment，
真係冇講錯！

加上User果邊又大地震，
真係蛹上加蛹，
比人睇到真係唔係咁好，
希望快D變番毛毛蟲啦！

冷知識.

點解送殯做帛金一定要俾單數？
回禮「吉儀」又點解係有一蚊同一粒糖？

和合石三省行石廠主持人司徒愛麗話：
帛金要俾單數，係取諧音「一單過」冇下次意思。
回番一蚊就係因為以前一蚊只夠搭一程車，俾後 ，唔使返轉頭。
有人做白事已經係一件苦事，食糖係等親友唔好咁苦。

O2 Mini!!.

出左黎做野一年多，終於嘗試到買一樣Dream野，
就係我部Dream Phone — XdaII Mini (O2 Mini)！

呢個Dream出現左一年……
部機就係我上年岩岩入行果時出既，
本身就諗住農曆新年買，
之後又諗住出雙糧時買，
再黎就諗住升職之後買。
但係比五千蚊買樣野真係好XXXXX貴，
實左係唔捨得！

今日，T610收左皮，我終於可以Dream Come True，
係買機試機果一刻真係勁開心！
古語有伝：千金難買心頭好是也。

鬼故一則 — 伯伯再見.

有一個媽媽，見到自己個女向住個窗講伯伯再見。
佢開頭都不以為然，但係個女日日都係咁講，
重要係黃昏，冇乜太陽果時先會咁講。

咁岩老爺又死左冇耐，係好奇之下，
佢走埋去問：女女你同邊個講再見呀？
女女拎轉身話……

我同太陽伯伯講再見囉。 <-- Highlight this line!

外星人.

今日聽森美小儀，
有位聽眾係網上留言話有一位外國既牙醫應為，
外星人黎地球係為左偷牙膏，
而佢地捉地球人原來係為左研究我地人類既牙齒。

雲海先生冇否定佢既說法，
更講出左外星人黎地球既另一種恐怕說法。
佢話外國既研究人員發現，
外星人喜歡地球人自然地發出既一樣野，
而且係每一個人都會產生出黎，
呢樣野就係恐懼！
外星人以人類既恐懼為食糧，
所以佢地捉地球人或者出現係地球，
令地球出現恐慌，佢地就有好多既食物……
不可思議呢。

晉升.

再別肥妹.

今朝一番到黎，我成個人Shock左，
我個養女肥妹去左一個好遠既地方……

輕輕的我走了，正如我輕輕的來；
我輕輕的招手，作別西天的雲彩。

但我不能放歌，悄悄是別離的笙簫；
夏蟲也為我沈默，沈默是今晚的康橋！

悄悄的我走了，正如我悄悄的來，
我揮一揮衣袖，不帶走一片雲彩。

~ 肥妹悄悄地離去，留下別離的笙簫‧阿門 ~

安尼他 Last Day.

上個禮拜五同安尼他Farewell之後，
今日佢就Last Day，請大家食散水餅之後就走了。

我地Team送左張咭比佢，
大家都係上面簽個名，同寫一D祝福既說話。
我睇左大家寫乜之後，
就寫上：P仔 Roy 2006 Summer

寫完我都唔知自己寫錯野，
到艾力寫果陣先知我寫錯左2006年﹐應該係2005年先岩。
只怪我信錯左添尚宮，佢寫左：Timothy 2006 June……哈哈！

VB.NET.

最近心血來潮，想學下傳說中既VB (Visual Basic) Language，
於是走左去買套工具番黎，包括Software同埋工具書，
走向知識之門。

用左兩個鐘去Install左個software同埋個幾鐘去睇
VB既介紹，都差唔多訓左……

為左令自己既鬥志番黎，即刻Skip左睇書，
開始實戰一下。

VB真係話難唔難，話易唔易，
但係就好鬼快，唔使逐行Code打，
又唔使執位，佢自動幫你排到D Code靚靚，
岩晒我一貫既作風，哈哈！

覺得佢難應該係我真係完全唔識，
同埋佢有好多複雜預設既字眼都好難記。

希望熟能生巧，快D學多樣武功先。

自修日二.

上個星期六既自修日得到唔錯既成績，
所以今個星期六黎一個自修日二部曲。

由於今日係端午節，所以都順道介紹一下呢個節日既起源：
關於端午節的起源，歷來眾說紛紜 —

• 惡月說
• 端午節源於夏至
• 紀念屈原
• 紀念曹娥
• 紀念伍子胥
• 聞一多之研究
• 白蛇傳傳說

其中紀念曹娥既故事最感人 —
東漢時代，有位年僅十四歲的孝女曹娥，
因父親溺死江中，沿江嚎哭尋找父親屍體，
過了17天，依舊不見其父屍首，因此在五月五那天，
投河自盡。幾日後，村人赫然發現，曹娥抱著其父，
兩人屍首一同浮出水面。
當地人為紀念其孝行，將那條河命名為「曹娥江」，
並在每年五月五日也滑龍舟競渡。

稻香午飯.

今朝一早伊梵敏姐佢地無端端話食Team飯，
大家都一頭冒水，係度諗做乜無端端食Team飯。

伊梵話買個關子先，原因會以Email公佈。
後尾先知原來都係人事既變更。

之後揀左去稻香食飯，大家都有傾有講，
最攪笑係阿傑係咁話阿祖似鐘姑娘，
跟住阿祖面紅兼勁冇耐。

大吃一番之後，例牌要食番個楊枝金露先撤退，
每位七十五，真係一個高消費項目。

十大呃細路既大話.

01.同你儲埋d利是錢入銀行(最多細路受騙既大話)
02.生舊叉燒,好過生你(生到舊叉燒話你勁)
03.再喊叫警察叔叔拉你(喊都要比人拉= =?)
04.食蔥會聰明 D (咁食髮菜咪會生多 D 頭髮?!)
05.食唔清 D 飯會娶個豆皮老婆(都唔知咩理論)
06.裝人沖涼會生眼挑針(無事喎)
07.講大話甩大牙,但係都冇甩過半隻(講左咁多年大話都未試過)
08.唔好玩橡筋，因為橡筋會吸血(vampire??)
09.咪周圍走...如果唔係比"鴉污"捉左你
10.同人咀過會大肚

平靜日子.

呢期做系統測試，
真算係咁多樣野之中最輕鬆既一樣。

經過之前個幾月既風雨洗禮之後，
今日終於有D平靜既日子過下……

不過預料未來會有更大既暴風雨。
加把勁！伙計！

半天假.

今日請左半日假去睇醫生，
因為果個醫生剩係得早診，真係巴閉！

呢個醫生以前好出名，
因為佢幫過張學友睇過皮膚，重攪到佢鬼咁靚仔，
而我阿哥都係因為佢而冇晒暗瘡，
所以我都去幫襯下佢。

通常睇醫生都要等好耐，
就算掛左號，約好晒，都要等最少半個鐘。
本身諗住約左九點，計埋拎藥都要攪到十一點啦，
點知九點三就睇完，九點九拎埋藥走得，真係勁快。

醫生費四百，一日藥費一百，重要食三個月藥 ……
唉，希望真係破財擋災啦。

困難重重.

之前講緊果個好鬼麻煩既Marketing Program，
今日終於真真正正出街。

滿懷自信既我遭到一次又一次既打擊，
結果做到手都震埋，真係水皮。

攪下攪下，改下改下，好彩最後都有個滿意既結果，
做到七點都有得鬆人。

又要敏姐係度陪我OT真係唔好意思呢……

Toilet in Switzerland.

自修日.

由於阿豬媽下星期就要考試，
所以今日我地就係屋企溫書。

風聲雨聲讀書聲，聲聲入耳。

小寶寶，食蛋糕。

係農曆年初果陣，公司既傳統會一人派一張餅咭，
而我地Team都有個習俗，就係夾埋D餅咭一齊訂西餅食。

今日我地反傳統，唔訂一件件果D食餅，
訂左一個磅半既芒果蛋糕，攪攪新意。

今次阿強做死使落去拎餅，
艾力就上去拎飲品同埋用具。

阿強由於心急得滯，唔記得拎切餅刀，
大家即刻呆左……
最後用大家樂既膠刀，而操刀既阿和真係有D料到，
分左十二個餅之後都面不改容，真係西厲！

小吃小喝之後就放工回歸 lu。

氣泵和氣炭.

今日去金魚街睇下有冇野
可以令到我個濾水器唔好咁大水。

行下行下都見唔到好野，
跟住比我見到一間舖，
入面有個魚缸有粒野塞住個出水位，
D水即刻細左。

我就問果個哥仔有冇果粒野買，
果位哥仔一望之下：果粒野？哦，氣炭。
我即刻覺得自己大鄉里，不過唔係養開魚都冇計。

買左粒兩蚊既氣炭之後，
就再行到一間店，發現左原來係有氣泵呢樣野。
原來我一直見到既係氣泵而唔係濾水器……
哈哈，好彩我冇用粒氣炭塞住個濾水器！

最後買左個廿蚊既氣泵番黎玩下咁，
但係我都係覺得佢麻麻地，因為佢不停咁製造嘈音。
最後，濾水器都係無用武之地。

豐富晩餐.

今日阿豬媽開始佢既艱辛假期，
我放左工就去搵佢輕鬆下。

照舊去番去開果間茶餐廳，
今次我地大吃一番，
叫左一個燒味雙拼，一條桂花魚，
粟米魚肚羹同埋凍飲。

個燒味有我最鐘意食既切雞 (仲要係雞脾)，
又有阿豬媽鐘意既燒鵝。
條桂花魚就蒸得耐左DD，所以覺得孩左小小。

其實呢D餸我地果時係Hall都成日整，
所以令人回味係Hall既日子。

食飽之後，又要繼續努力了。

Programmer Trainee Last Day.

今日係五月三十一號，明天係六月一號，
過幾日就係六四，過多幾日又到端午節。

上年既今日，我就期待一份新既工作，
唔知會做成點。

今日就係度諗緊升職會加幾多人工，
唔知會多定少。

廿四的我，就是廿四。

柔綿體驗.

賓妹公路.

每逢星期日，銅鑼灣中環一帶都有好多賓妹，
真係覺得搭地鐵都去到菲律賓一樣，
又或者菲律賓同香港合併左，變左菲律香賓。

最近銅鑼灣重出現左一條賓妹公路，
就係係銅鑼灣地帶果一條長馬路延伸到去維園入口。
入左呢條公路之後，
你就彷彿去到菲律賓最繁榮既市集一樣，
你剩係聽到你身邊果一個人係講廣東話，
其他既人聲你都唔知佢講乜。
加上你都好小會見到香港人，
只會係咁比果度既本地人阻住你行。
短短五分鐘既路程，你好似用左五十分鐘既氣力去行咁。

所以大家冇乜事都唔好亂闖呢條 — 賓妹公路。

阿砒蘇.

話咁快就係永隆做左一年，
再過多幾日就可能有得升職，
正正式式做 Programmer。

今日大佬約見我地六月夠期果班人做阿砒蘇，
係我重趕緊我個Marketing Program既時候，
做阿砒蘇真係唔合時，唉，又冇左半日。

照例大佬都係問我地有冇乜野問題，
又講左一番說話勉勵下我地咁，咁就一個鐘……
其實如果佢唱商台既人人或者天天去鼓勵下我地，
可能效果會好好喎，哈哈！

死亡證書.

死亡年份：2050年
死因：撞死
死因種類：腦積血致死
死亡地點：公司
死亡狀況 —

公司開大會，一個一直對你不滿的同事，
在一個重要會議上突然發難，令你當場出醜，
你一下子答不到對方提出的問題。你覺得很羞恥，
一怒之下大力撞擊他，而他一閃，你卻撞向牆角致死。

(死亡證書)

地球反擊戰.

今日不幸既事終於發生左……
首先要向阿金同埋羅拉講Sorry先，
因為我浪費左佢地既食物。

由於連日來被果個Marketng Program煎高左我既皮質醇，
加上阿和又黎挑起事端，
於是我終於掩蓋唔到我既本性，
要進行反擊戰，誓要一拍兩散。

話說今日阿和又再整D食物碎落我個魚缸，
(計埋今次，佢應該係第十萬八千次做呢D無聊野)
我終於睇唔過眼就進行反擊，
張成塊紫菜扔左落佢個缸度，
跟住佢就拎番塊紫菜上黎扔番落我個缸度，
重要起勢咁攪，攪到碎晒，變左紫菜湯。
我不咁示弱，拎張幾番薯片同係垃圾桶執D紙巾扔番佢，
之後兩敗俱傷，各自收拾殘局。

咁大個人，重好似小學生咁整黎整去，我都唔係咁想。
但係我唔反擊既話，只會一直被人視為弱者……
所以我唯有出此下策，哀哉……

(被人覺得我地城大既學生就係咁既質地。醒吧，城大高材生。)

曾特首呈遲.

今日接近黃昏既時間，
我地既曾處理特首向中央呈遲，
並且宣佈參加今年既特首選舉。

無線播左曾處理特首既新聞發佈會片段，
聽到曾處理特首話：
身於斯、長於斯，
飲香港水、流香港血……
真係令人毛骨悚然。

之後重有曾處理特首既履歷特備節目，
由曾處理特首出世到名成利就既過程
剪輯成一個節目環節。
我睇完之後比幫呢個節目起左個名 —
永遠懷念，曾蔭權的一生。

廿四孝?

成日聽到人地講話廿四孝乜乜，其實廿四孝係乜呢？

廿四孝其實係二十四個流傳我國家喻戶曉的民間故事，
每一刻故事之孝行雖不相同，但皆足以發揚我國固有道德，
故事中雖有荒唐，且似不切實際，惟其孝德之崇高，
精神之偉大，實堪為後世之範矣。

孝 感 動 天 親 嘗 湯 藥 嚙 指 痛 心 負 米 養 親
賣 身 葬 父 鹿 乳 奉 親 懷 橘 遺 親 臥 冰 求 鯉
戲 彩 娛 樂 扇 枕 溫 衾 哭 竹 生 筍 滌 親 溺 器
一 日 三 朝 上 書 救 父 跪 讀 父 書 棄 官 奉 親
傷 指 念 親 行 乞 養 親 籠 負 母 歸 孝 傳 五 世
遂 成 母 願 兄 弟 力 孝 勸 姑 孝 祖 兄 弟 爭 孝

忙野.

呢個星期開始又要進入忙野狀態，
因為又有一個Marketing Promotion Program要係六月頭起貨。
本身我就對呢D Progam仔好有信心，
想當年敵哥話齋，真係可以一日做三個。

但係唔知做乜鬼自己好似去左遊魂咁，
做黎做去都力不從心，結果梗係事倍功半啦。

希望五月尾可以做完，趕得切交功課啦，唉……

笑談廣東話.

01.
我：[小姐吹頭ar~想點吹!!]
小姐：[ 同我推返個言! !]
我心諗推乜鬼言ar~~ 原來佢係想講~[ 吹返個形 ]

02.
一班內地女人傾計,話: "我地不如做雀仔呀媽lor?"
.......(腳底按犘ar)

03.
廣東話唔正的人到茶餐廳飲野：〝唔該同我射d精〞
﹝唔該同我寫d drink﹞

04.
有個女人問路:"先生,請問 " 侏儒村"係邊呀？.."
先生都唔識答佢(原來〝侏儒村〞=G2000 )

05.大陸女人對她的香港朋友說:"攤直射"好好玩架".....
香港朋友:"咩野「攤直射」呀? 點玩架?
大陸女人:"我教你玩丫~~
(跟住拿出Nokia手機一部), 呢個咪「攤直射」啦!".....(攤直射=貪食蛇)

Open University.

今日安尼沙同我講話我地會同OpenU攪Affinity Card，
轉個頭我就被召喚同柏納、敏姐開會。

後來我就發現左點解剩係搵我，
因為要商討既問題開正我果瓣 —
Marketing Promotion Program。

柏納講左個Problem出黎之後，
叫左大家Brain Storm下。
第二D我唔敢講，講起Game Rule呢D野我都OK架，
所以我就梗係踴躍咁發表我既意見啦。
當滿以為自己好醒之際，就被柏納反駁左，
SSA真係唔同D，我地呢D做後生真係要比心機學下野。

傾左一陣之後，得出左大部份既解決方案，完滿散會。

夏雪日本料理.

今晚同左阿豬媽去食好野，
揀左去旺角山東街果間夏雪日本料理。

呢間日本野開左冇耐，
主要都好似水道橋果D咁，
除左有大路既壽司同埋刺身，
重有一D佢地自家制既特色食品。

我地叫左：

1. 春夏秋冬 (四款唔同既特食飯仔)


2. 刺身併盤


3. 龍蝦麵豉湯


4. 特長鰻魚壽司


5. 美人魚壽司 (三文魚加甜蝦壽司)

值得一讚既係果個刺身併盤，
九十幾蚊食足八款刺身，
雖然每款得兩件，但係佢D野身鮮得黎冇乜雪味，
所以我覺得物有所值。
春夏秋冬都好得意，賣相好靚，味道OK啦。
唯一係龍蝦麵豉湯唔係好得，
因為一啖龍蝦肉都冇，得D龍蝦殼，比佢呃左。

食得勁飽，二百幾蚊黎講，呢間餐廳係好介紹，
唯一係等位要用好多時間，餓左死。

舊同學聚餐.

今晚同一班好耐冇見既中學同學食晚飯。
諗番真係超耐冇見，自從中學畢業已經好少見，
入左大學更加係失去聯絡，
有幾個都係間唔時係大學Podium見到果隻，哈哈。

大家都成5年冇見，雖然大家比起中學果時一把年紀，
但係大家都有傾有講，好似以前咁，冇乜變過。
係講講下有一位女同學話下個月結婚先嚇親大家，
而大家都覺得光陰不再了。

三男三女去左和民食野，
我本人已經勁食架喇，
點知都係唔夠飽，唉……

再黎去左麻布茶房食甜品，
我叫左個香蕉聖代，其實就係香蕉雪糕。
諗住好耐冇食過蕉試下呢個啦，
點知佢勁鬼多香蕉，食到我……
真係唔飽都比D蕉塞飽左。

最後大伙兒一齊搭火車番屋企Lu。

相繼壞機.

繼阿傑上個星期中左Nail.exe既入侵之後，
今日安尼沙部機又Short Short地。

話說今朝安尼沙今晨番黎開機，
剩係見到wallpaper，乜都做唔到。

後來發現左係果個explorer.exe啓動唔到，
call左人手落黎進行救援工作，
最後使出左頭痛醫頭既一招拎到部機暫時復活。

但係暗藏殺機，
安尼沙用左好多時間去restore番部機，
但係當用到Norton Live Update既時候用唔到，
於是我提議Boot機。

從此，一Boot不起，藍底白字，宣佈收Skin。

不知不覺訓著左.

琴晚10點照舊開收音機聽森美小儀，
不過勁攰咁都冇聽佢地講乜，
灘左係張床到進入半睡狀態。

同阿豬媽講完早抖之後就諗住去飲杯水，
之後去埋殊殊就訓覺。

點知唔知做乜鬼收左線之後就訓著左，
電腦又冇熄，燈又冇熄，直到三點鐘……
無端端紮醒左，收音機播緊一首英文歌，
我不以為意，熄左個收音機，
去埋殊殊，熄晒D野，繼續訓覺……

身水身汗.

呢期唔知做乜鬼，天口咁鬼慶，
又焗又熱，真係出街都變左水人。

今日出左銅鑼灣同阿豬媽渡過左半日之後，
就落左黃金買羅技既無線鍵盤滑鼠組合。

行晒成個黃金之後，最後都係去番地鐵站果間買，
因為佢平過黃金最平果擋兩蚊咁多。

買完之後行去搭車真係行死左，
條褲濕左大半，好彩最後黎左架冷氣巴，
如果坐熱九可能會人間蒸發左 ……

小白鷺 BBQ.

今晚我地為Yoga同阿彼補祝同預祝生日，
決定左大熱天時去BBQ。

去左大家都冇去過既大埔窖小白鷺BBQ燒烤場。
果個燒烤場就係一個湖既上面，對住吐露港，
間唔時有D火車經過咁，果環境都OK。
但係服務質素就麻麻地，D服務員唔係咁Nice，
可能天口慶，大家都慶慶地。
食物質素都係屬於差果隻，冇乜食物揀之餘，
又冇乜俺過，食落去淡而冇味，真係失望。

好彩，琴日我地人數搭救，
有成打有多，大家都有傾有講，氣氛良好。
阿彼仲教左我幾野夜粥，
話晒都係警察，係唔同D，哈哈。

不過下次都係唔好攪炎夏BBQ喇……
真係熱到顛左！哈哈！

Yeah！出糧.

我地公司真係冇乜特別好，
係出糧會係假期前出果度好。

如果出糧日係紅色公眾假期，
我地公司就會係前一日出糧，
真係開心晒。

雖然呢個可能係勞工法例，
但係唔理佢咁多，有錢最實際。

出埋今次糧，下個月就會升Programmer，
到時份糧應該都會多一百幾十，都唔錯啦。

多舊魚.

唉！
寫Program呢家野，同法律既條款一樣，
一字一句都唔可以錯。

今日就係為左法律一樣既Program，
做左成日野，飲杯水既時間都冇呢，
真係無奈，只怪自己太渣啦……

架勢堂鬼聲.

今日又係一個星得一次既架勢堂講乜鬼，
照例森美佢地吹左一個鐘頭水之後，
就係聽眾打上去講鬼故。

今晚因為聽眾講得唔係咁好，
阿迪偉話今日係佢最後一日做講乜鬼，
叫D聽眾講D恐怖既鬼故嚇下佢咁。

跟住就聽聽下節目有一把古怪既女人聲出現左，
當時我都以為係果個配樂既金仔整出黎，
但係後黎佢地個個都話冇整過，
問過下打黎果個聽眾又話唔係佢屋企人發聲，
架勢堂今次真係撞鬼……

睡魔.

由細到大，都會聽到睡魔呢個名詞。
點解拎你訓覺既會叫睡魔，
拎你發達既會叫財神呢？
可唔可以叫睡神或者叫財魔呢？

經過我初步既調查，
中國人係一個好勤力既民族，
佢地認為訓覺係一個懶惰既表現，
係約定俗成既情況下，
大家都會抱住人唔訓我唔訓既心態。
於是就叫果個拎你眼訓既意念做睡魔，
因為佢拎你做你唔想做既野，
即係普遍人所講既魔鬼行為。

至於財神唔可以叫財魔，大家都可以舉一返三，
有錢佬都唔會覺得呢個世界有財魔啦。

女子堕軌.

今日因為OK便利店開始有得換
McMug既任你掛既關係，
我就提早左起身，出發去旺角幫阿豬媽換。

第一個番到公司簽到，掛住傾電話，唔記得出絕招。
跟我簽果個又唔提番我出番絕招喎，攪到鬼咁尷尬，哈哈！

電話中既阿豬媽話火車撞到人要延誤，但係就唔知邊個站。
艾力番到黎話番比我地知原來就係旺角站有人跳軌，
消防警察都黎晒。

十一點幾睇番新聞先知係一個女子跳軌，
救番出黎已經死左……

睇黎我都有D運仔，避開左呢D野。

冷氣回歸.

自從上個禮拜比人拎走左部冷氣去整之後，
晚晚就好似番左80年代咁，要涼風扇，
仲要比D可惡既蚊咬到醒晒，真係無奈。

今日終於等到部冷氣番黎喇，
雖然今日唔係好熱，但係都要開佢一陣，
因為我要由80年代番返黎現代呢。

HoHoHo，涼晒……

搶包山.

下星期日係長洲一年一度既太平清醮，
全靠我地好聰明既何智平局長，
闊別左我地廿幾年既搶包山(當時我都未出世)，
終於再呈現係我地眼前。

搶包山 —
「包山」是先用竹搭上一個十三公尺高的棚塔，共三座，
另外還有七個小的棚塔，然後把三個萬個「幽包」
﹝貢過功神，受過神靈祐的包子﹞插上棚塔上，
疊成一座座包山。
當主禮人一聲令下，人們就蜂湧爬上包山去搶包子。
按傳統說法，取得越多包子，福氣就越高，
於是你推我擠，情況通常都十分混亂，有時弄到互相打罵。
直到1978年發生了包山塌下，以致二十四人被壓斷手腳，
政府才禁止「搶包山」這個節目，改為分派形式，大小平安。

今時今日，竹包山已經變左鐵包山，
取包子由為了福氣變成比賽勝出既要素，
會唔會對貢過功神不敬呢？

悲痛的早上.

終於到左星期六，早餐可以食好D，
由腸仔蛋轉食雞扒蛋，開心番一個早上。

點知好景不常，一番到去安尼沙佢地圍住我個魚缸，
我都心知不妙，行番埋位先知有一條魚死左，
仲要個魚缸D水濁晒，勁恐怖。

雞扒蛋放左埋一邊，Bug左其他魚離開個魚缸，
BugBug下得番六條生魚，重有五條去左邊﹖
原來唔只死左一條魚，仲有五條死左係個濾水器邊，
異常恐怖。

於是我同艾力夾手夾腳倒晒個魚缸D野，
之前辛辛苦苦攪到個魚缸有D成果，
又係比人攪成咁……
唉… 嘥心機，涯眼訓。

最後搞點晒，捱埋個早餐就開工Lu。

永勝攪事.

今日做做下野，永勝落黎搵人，
之後就幫我餵下魚咁。

點知好心做壞事，佢唔知我個魚糧樽口大，
倒到成個魚缸都係魚糧。

好彩，佢都有幫我吸番大部份出黎，
但係D魚糧唔係咁浮水，所以沉晒落底，
入晒D泥入面。

Lunch果時我自己都再吸多一次，
但係實左係吸唔到，個魚缸D水即刻濁左好多。
唉……

順暢.

今日係好幾個Project既Deadline，
我、敏姐、安尼沙都好緊張，希望順利渡過。

上星期我地同比利睇過晒D Project之後，
理論上已經冇晒問題，所以就要睇今日既造化。

果然，皇天不負有心人，
今日所有野都好順暢，冇任何阻滯，
準時放工，真係個人都輕鬆晒！

老香港水彩畫.

冇冷氣.

夏天終於都黎臨，
呢幾日都有成三十度，
熱鬼死人！

好衰唔衰，
我個冷氣機又壞左，
真係一年壞一次，
渣野。

搵人黎整又話要成部拎走，
成個星期先有得拎番，
真係超無奈。

呢個星期又要比蚊咬又要熱辣辣，
天啊……

Shopping.

今日同阿豬媽去左行街街，
去到Sogo果樹，阿豬媽睇中左一條牛仔裙，
試完之後，D Sales話買多一件有八折，
於是我地係度揀下有D乜好買。

D Sales係咁拎D衫出黎比阿豬媽試，但係都唔係咁岩款。
試晒成間Shop D衫咁滯之後，都係買多左一件背心算數。
哈哈！唔知會唔會比人地話我地搞事呢。

之後我地就行左去 i.t. 睇野，
睇睇下我仲要買埋添，買左一件衫一條褲用左八百幾，
好貴呀……

等了又等.

由於明天有得放假既關係，今晚決定出街食番晚。

計劃左去銅鑼灣好多人排隊果間峰壽司食，
我就提早八點一二去拎籌，諗住九點乜都等到啦。
點知一拎張籌，182號，拎果時先叫到一百二十幾號，
為左試下係咪真係咁好食，就同肥哥係度等喇。

等到成九點，阿豬媽放左學落黎，
都係叫到一百六十幾，大家決定等多一陣。
最後都係等唔到餓死咁滯就放棄左。

走左去打邊爐，行左幾間拎左幾張傳單，
就決定上去火鍋城下面果間試下。
嘩！響留下拉客果兩個阿姐嘈到顛，
係咁叫你地去佢果間，一路上樓梯，佢地就係地下狂叫，
都唔知佢地做乜，被佢地嘈到飽啦！

打到十二點到就滿肚回歸Lu。

比利.

今日諗住番半日工，輕輕鬆鬆度過啦。
點知阿比利話要Verify番果個Promotion Program，
結果就攪左成朝。

好彩我都係BS食過下夜粥，
如果唔係真係比人問到口啞啞，哈哈。

果個死人Program鬼咁多野，
但係又唔係咁多人受惠喎，真係……
最後都Draw左Conclusion，下星期就出街Lu。

Lancer Evolution VI.

夜晚本來過左第一城打波，
點知果度打比賽，於是就轉移陣地去牛皮沙打。

坐個Freind架Lancer Evo過去，
呢架車打機就睇得多，
但係就未真正坐過。

話到係尾都係日本車，
車箱唔係咁大，仲有一D迫既感覺，
呢D車都係好睇唔好坐，哈哈！

三岔口@IFC.

放左工同阿豬媽去IFC睇三岔口。
我都係第一次去IFC睇戲，
聽就聽得多果度D坐位好舒服，又大又剩，
今日去試過又真係好舒服wow，
同埋個院唔大，所以都唔會好嘈。

不過係阿豬媽隔離果個女仔係咁講電話，
由入場開始就不停咁響電話，
傾電話不特只，仲要唔較番振機，
連佢個Friend都頂佢唔順，話鬼佢，
佢仲駁話已經較左wow，真係想打巴佢。
咁忙買隻VCD睇下算啦！

講番套戲，我覺得個劇本真係寫得幾好，
諗諗下原來全部野都係有關連，有晒伏筆，真係好野。
吳彥祖演得超正，但係伊麵同城城就冇乜突破。
羅嘉良好似拍緊創世紀咁，攪到個氣氛麻麻，哈哈。
我比70分喇。

肥妹.

今日幫左魚缸其中一條魚改名，
叫左佢做肥妹。

因為佢係成個魚缸最大最肥，
又係一條魚女。
加上每次餵魚佢都成架潛水艇咁衝埋黎，
其他魚仔都要退避三舍。
順理成章，佢就比我同艾力叫左佢做肥妹。

Team Lunch @ 王家沙.

之前話伊梵升職請食飯，
今日終於等齊人去左王家沙食晏晝。

其實我個人認為王家沙都係麻麻地，
但係又去過稻香呀泉章居呀，
諗住去一度未去過既試下啦。

一行十一人就一齊去到坐底食野。
一開波黎左一個煎牛肉飽，得四舊，
都唔知夠你食定夠我飽，於是大家都冇起筷。
等多幾分鐘，D野都黎得五五六六，
大家都開始開餐。

食完之後我都係覺得稻香果D好味D，
可能有楊枝甘露啦，哈哈！

最後一人.

呢期User成日要試野，
所以隔一兩日就要黎一轉Batch，
加上又要做Cash咭果D野，
真係人都顛左。

由於要行埋個Batch既關係，
今晚又有我份，哈哈。

不過今晚係有史以來成Team人走晒我都未走，
留守到最後一秒，超勁，HoHoHo。

不過，公司重有其他人係度，
佢地真係勁，好似唔使放工咁……服！

麥記牛河.

麥當勞於2001年引入由「無煙自動炒菜機」
改良而成的「無煙自動炒牛河機」，
並開始研製「麥牛河」，該食品現已進入
秘密試食階段，相信麥牛河」推出後亦會掀起一鼓熱潮。

秘密試食團試食後均表示「麥牛河」出奇地好吃，
牛肉鮮嫩，河粉軟滑，又不油 膩，芽菜和洋蔥非常爽脆，
味道可媲美中式酒家的「乾炒牛河」。

鎖車惹的禍.

話說琴晚落街打波，打打下有人黎鎖車。
因為個籃球場隔離有條小馬路，
有幾個波友揸車落黎就拍係果度。

按照以前既經驗，車主返番去架車到，
果班人就唔會鎖車，跟手就走埋，
我地繼續打波。

但係琴晚就攪鬼，果個四眼仔唔知新黎定攪事，
係都話唔揸走架車就要鎖，
幾個人睇唔過眼就走埋去同佢理論。
(當然係惡果D啦，我地呢D梗係企埋一邊睇野)
個果四眼仔被人圍，於是Call馬，
黎左幾個阿叔同埋一個肥佬，都係果D屋邨食蕉啦。

果團人又幾個人變十幾個，仲有途人圍觀，
當然係先後角繼而動武啦。

攪左半個鐘有多，最後都係要揸走D車。
再過多三四個字，兩架衝鋒車揸過黎，
十幾個警察衝落車，手持循牌警棍，非常大陣仗。

警察盤問一輪之後都收左隊，
最後大家都繼續打波，冇人被捕。

添尚宮凱旋歸來.

添尚宮今日放完大假番黎，
我拜託佢既事果然幫我辦妥左，
最後都幫我買到個MonChhiChi散紙包，
真係冇所託非人，哈哈！

Lamp Vs Light.

琴日買e-zone送左盞細既USB燈仔，
岩晒我個魚缸，於是今日就拎左番公司用。

用左唔夠兩個鐘就燒左 ……
真係名乎其實平野冇好！

但係用左兩個鐘都好，
比我發現左原來用燈照住個魚缸會靚好多，
水又清D草又綠D，
所以就決定Lunch去旺電買個USB燈用下咁。

行左幾間見到有，問左係30蚊就買左。
拎單既時候，
寫單果個問賣果個個客買左乜，
佢話個客買左 USB Lamp，
跟住寫果個話係 USB Light，
賣果個唔Firm，話一陣問下人，
又話應該係 Lamp，Light係解光，
佢地討論完，我拎張單都寫左USB Lamp。
我係果度勁想笑，但係又要扮晒無野咁，
一來個盒有寫，唔知爻乜，
二來Lamp同Light都唔識，香港九年免費教育真係冇鬼用。

有志者.

自從放左泥落去個魚缸度，
我每一個Lunch都忙到死左，
因為要係咁換水，等D水唔好咁濁。

前一兩個星期，
個個行過都話我攪乜鬼攪到D水咁鬼濁，
又有好幾次叫我放棄，
點換都係咁濁，冇得救。

但係本住不死既精神同毅力，
去研究左好多不同換水既方法，
最後被我換到缸水好好多，
D人行過都話缸水清左好多，真係開心。

而撒旦阿婆依然都係果句：咪又係咁濁！
唔知係佢白內障定乜野，
日日佢都係話D水濁，真係唔使理佢既comment。
Anyway，撒旦係唔會比希望你。

最後要多謝與我並肩換水既艾力，
雖然佢都係坐係度，我就行黎行去行死左，
不過佢都好有心既。
仲要多謝阿珍借左個缸比我養住D魚，
同埋安尼沙幫我買濾水器。

詩偉語錄 <堅持自己想法>

魚大了.

唔經唔覺，我D魚仔已經養左兩個幾月Lu。
佢地一日食三餐，無憂無慮，所以都健康成長。
但係就每日受到撒旦阿婆同艾力無情既折磨，
真係聞者傷心聽者流淚。

宜家有兩條已經大條左，應該係一條男一條女，
我諗再過多一個月到就會成形，
長出靚靚既孔雀尾，Yeah！

戀愛態度各有特色.

人馬坐
好奇而富冒險精神的人馬座很容易成為人群的焦點，
吸引不少異性的目光。他大膽而前衛，
對於任何新觀點都抱接受的態度，
故此他的愛情觀是多變而叫人難以相信地前衛的。
要捉緊他先要讓自己保持神秘，和他保持一定的隔離，
使他對你又愛又恨。

山羊座
保守成熟的山羊座對情人可說是非常專一而關心的，
但他慣常地不喜歡被人佔有，卻要求對方完全屬於自己，
是個矛盾的固執者。他是細心的，但性格有時比較暴躁，
這都源於他不大懂得表達自己的情感罷了。
要捉緊他，就需要多花點時間和他溝通，
否則你會被他表面粗暴而氣死的。

又睇醫生.

自從上次睇完醫生食左幾日藥之後，
個氣管炎好似走左咁，連日來都咳少左好多。

但係D天氣又係衰，時凍時熱，
攪到個病斷唔到尾，
今日都係要死死氣咁去睇醫生。

醫生話我係氣管敏感，
天氣唔穩定或者屋企有花呀毛呀，
都會惹咳。

(下，我不嬲都冇咳開架喎，
講到我好似長期病患咁既？)

Anyway，希望食埋今次藥會好番晒啦，
醫生話如果今次食完都係咁就冇得醫 wow ……

鱷魚潭.

為左美化一下我個魚缸，
問左有多年水種植物經驗既域奇拎左一包泥，
再去金魚街買左幾棵水草，開始我既美化計劃。

問左域奇，正確步驟：

1. 洗左個魚缸
2. 放泥落去
3. 舖塊野係泥上面
4. 慢慢加水
5. 種水草

以上既步驟係減低泥被沖起既機會，
避免水變得混濁。

我做好左 Step 1 and 2 之後，
就用張A4紙舖係面，之後加水。
加加下之發覺張A4紙升起左，
下面既水已經有D濁。
唔理咁多，繼續加水，加水，加水 ……

最後個魚缸變左鱷魚潭 ……

花紅加人工日.

今日係大日子，
因為今日係出花紅同加人工日。

一早起身上網Check個Balance，
嘩！咁大個仔都未試過咁有錢，哈哈！

番到公司，大家都討論緊加左幾多，
條數好難計，冇人計到。

到左下午，謎底終於解開！
唔知係咪我期望太低，
所以有咁既加幅覺得好開心，Yeah！

人參阿姐鬧Lift.

今日放工搭Lift遭遇：
Life 入面有： 兩個阿姐，三個男仔。

(阿姐A係度摷一個袋)
阿姐B：你係度搵乜姐？
阿姐A：(勁大聲)我包人參呢﹖
我心諗：(洗唔洗咁大聲呀！係咪頭先買左唔記得拎呀。)
阿姐B：(沉默……)
阿姐A：(繼續摷)(勁大聲)冇既，我包人參呢？
阿姐B：係咪唔記得拎呀？
阿姐A：(繼續摷)(勁大聲)冇既，係咪你拎左我架?
阿姐B：我冇拎你，你搵清楚D。
阿姐A：(繼續摷)(勁大聲)冇呀，係咪你拎左我架?
(阿姐A走去摷阿姐B果袋，發現一包人參，拎出黎舉)
阿姐A：重話唔係你拎左，呢包咪我架Lor。
阿姐B：喂你做乜呀，呢包我架！
(兩人發生爭執，推撞)
阿姐A：(面向Lift內既人)大家做證呀，佢拎左我包人參。
(Lift內冇人理阿姐A)
阿姐B：做乜證姐，包人參我架！
(架Lift到左四樓，冇人入冇人出)
(兩人繼續發生爭執，推撞)
(架Lift到左地下，我即刻閃左)

人參阿姐鬧Lift，真係咁都得！

月結單之鬼.

黎緊七月中就推出新產品，
我地Team呢幾個月又要忙一輪Lu。

我都係照舊負責月結單部份，
真係話難唔難話易唔易既工作。

由於時間關係，今次都係原用上次既approach，
希望順順利利啦。

我既小志願係寫一個月結單Program，
可以支援所有既產品！

添尚宮之旅.

今日起我隔離位既添尚宮同事就會放大假，
總共放十日假，用左八日去日本，
真係羡慕死人！

由於今年世界博覽會會係日本舉行，
所以有好多主題精品推出左。
MonChhiChi都推出左愛﹒地球系列，
勁靚，所以叫左添尚宮幫我買。
希望佢完成任務啦！

程序編纂員.

成個人進入左寫Program既日子，
日又寫夜又寫，個腦就黎轉到出煙。

呢行飯，真係唔易食。

張國榮.

據近日數家阿根廷著名媒體報導，
有人曾在布宜諾賽勒斯的街頭曾目睹酷
似去年跳樓身亡的張國榮。

據稱當時一名當地華人在市區的一個陋巷角處
見到一名戴墨鏡的男子，極似張國榮。

正當這名華人要追上去看個清楚時，
那名戴墨鏡男子卻拐過巷角不見了。

據稱當日天氣很好，距離也不遠，
那位華人經驗證也沒有很嚴重的近視。

反日潮.

日本篡改歷史教科書，侵佔釣魚台，
拎中國大陸既一股反日怒潮產生！

大批學生群眾上街遊行，
「強烈抗議日本篡改歷史 」、
「堅決反對日本入常」、「堅持抵制日 」
表現我國既民族意識。

那邊箱北京既學生不停大叫口號反日，
這邊箱香港既學生不停咁諗買邊部電話
邊部Mp3機好。

始終我地係香港人，只得一半民族意識。

教宗喪禮.

今日教宗正式舉行喪禮，
有成二百幾萬人走左去觀禮。

教宗真係西厲，死前死後都有咁多人支持佢，
為佢祈禱為佢喊，真係一代偉人！

全個喪禮都對外公開，
唯最後由神職人員送教宗入死亡之門，
同埋埋葬教宗係地下墓室冇錄影，
但係都有相片公開，真係一D都冇拎信眾失望。

教宗入土為安吧！

忙.

呢期工作非常繁忙，
同一時間做三四樣野，做到死左。

今日重要行UAT行到八點先有得走，
真係做到有幾公升皮質醇係個身到，
攰 ……

花地瑪預言.

由於聽森美小儀既關係認識左花地瑪預言，
又由於教宗若望保祿二世岩岩過身，
呢個預言又再抄番出黎講。

1917年5月至10月，在葡萄牙花地瑪鎮，
聖母瑪莉亞出現在3個小孩子面前，達6次之多。
最初天使現身，接著在天使帶領下，聖母瑪莉亞出現了。

聖母給孩子麵包和葡萄酒。在基督教中，
麵包代表基督的肉體，酒則代表基督的血。
獲得麵包和酒，在基督教中象徵最崇高的祝褔。

就在某一天，瑪莉亞對孩子說：「從現在開始，
請把我的話全部記下，好好地封印保存起來。
在得到我的通知前絕不可以去除掉這個封印。
孩子們從瑪莉亞口中聽到後記載下來的，
就是「花地瑪的預言」。

瑪莉亞預言左三件事會影響全世界，
頭兩個預言被證實精準地和事實完全穩合，
分別係第二次世界大戰和蘇聯共產黨的興亡。

第三個預言就從未有人公開過，
但係有傳話教宗已經知道左第三個預言既內容。
如今教宗已去，預言既下場有待時間去證明！

洗魚缸.

今日Lunch終於可以洗下個魚缸換下水咁。
諗番個魚缸都好耐冇洗Lu，
除左吸下臭臭之外都冇乜點打理，
真係難為左D魚仔！

問左西菲亞借左另一個魚缸之後，
就Bug晒D魚仔過缸，
Bug完之後點數好似少左一條。
好彩到左最後都搵番佢，
如果唔係佢就比我沖左落大海Lu。

好邪呀.

話說我地復活節前去左大尾篤BBQ，
之後我就病左成個禮拜，
問番先知原來果日一齊去BBQ既人當中，
唔只我一個病左！

星爺係BBQ完之後幾日都病左，
重要係同我一樣狂咳，重好鬼嚴重，
入左急症室！

跟住我就諗我地兩個果晚做過乜講過乜，
唔知係咪得罪左果D野……

諗番當晚燒完野夜食執完野，
星爺話想去洗手間洗手，
咁見佢一條友去咁驚，咁我就陪埋佢啦。
去到果個公廁都覺得好光猛，冇乜野，
咁我就照常洗手，佢就去左小便。
之後都冇乜野咁離開果個公廁，
最後搭的士番屋企。

諗黎諗去我地兩個有做過而其他人冇做過
既就係去廁所，唔使係咪就係果個公廁有古怪 ……

氣管炎.

今日都係頂唔住頸去左睇第二個醫生，
今次幫襯醫學會副會長馮宜亮醫生，
好似好勁咁。

佢係兒科專科醫生，有好多BB仔係果度等睇醫生，
無端端有一兩個大人登記好似好怪咁，
但係睇得好就得啦。

果個醫生問左我有乜病之後，
就好似其他醫生咁照下我個口嚨同埋鼻，
之後都係聽下個肚呀心口呀同埋背脊咁，
之後就話我呢個係氣管炎！

嘩！氣管炎唔係阿叔先有架咩﹖
況且我平時都冇乜病痛，做乜會攪成咁架﹖
唔怪之我咳到成個阿叔咁啦，
真係無啦啦有達啦，唉 ……
希望食左佢D藥快D好番啦！

新任務.

今日番半日工，
柏納無端端搵我去傾野，
我即刻諗唔知是福是禍，
不過應該冇乜野既。

傾完一輪即刻安心晒，
原來佢想我學多D野，
對我將來既發展會好好多。

一個新任務由始出發！

Cash Card.

繼上年既人民幣咭之後，
係今年年中我地銀行又會推出Cash Card。

由於係新野，好多Details都未係好清楚，
我諗同Visa扣帳咭差唔多啦：

VISA扣帳咭讓您可以由您的銀行戶口直接付帳，
而付帳紀錄將會詳列於您的銀行月結單中， 令理財更方便。

下次您出外旅遊購物，或者在港購買日用品、
上酒樓吃飯或給汽車入油，都可使用VISA扣帳咭，
而毋須用現金，因為VISA扣帳咭令購物更方便、快捷和安全，
並通行於全球以千萬計的商號，令您不論是在家或外遊，
都擁有所需的購買力。

同時，您更可在全球逾800,000台自動櫃員機，
使用VISA扣帳咭提款。

大病初愈.

由星期初發病到今日都好似未好得晒咁，
重有D咳同埋口嚨痛咁，真係唔知做乜病咁耐，
幾年都冇試過咁，唉 ……

夜晚又再去配藥食，D藥食完之後重咳得西厲左，
唔知係咪唔岩食呢﹖

夜晚訓教咳到成個阿叔咁，
成兩點先訓到，死咁滯，SHIT！

誰想有病，厭惡呻吟……

臥病在床.

發病中 ……

財少身子弱.

前幾日開始覺得唔妥之後，
今日終於頂唔住，把聲變左志偉哥，
又有小小發燒頭痛咁，真係體弱多病。

夜晚走左去睇醫生，
一個月幫襯一次，真係唔底，
已經財少，重要身子弱，真係陰功 ……

洗頭元秋姐.

今日本來代阿豬媽上堂，
因為佢有兩堂撞左時間，
所以我就代佢上一堂，錄下音抄下筆記咁。

但係琴日既病魔又再造訪，
攪到成朝都唔舒服，於是就番左屋企訓教。

訓醒之後去左剪頭髮，
個洗頭阿姐勁似元秋姐，
仲要一估就估中我廿四歲，
真係西厲！

做家務.

今日早上同阿豬媽去圖書館溫習，
由食早餐開始已經有D唔舒服，
耦下耦下都唔係咁掂，於是決定番屋企。

由於應承左阿媽要抹窗，加上又好似冇乜事咁，
所以一番到屋企就用左個半鐘黎抹窗。

抹完之後好似好精神咁，
就落街食野同打波，但係打打下落雨，
就番家食飯lu。

開心復活節.

今日同阿豬媽行街Shopping，
衫褲鞋褸大豐收，都算冇白費腳骨力。

唔知D人係咪去晒旅行呢，
太子果幾個商場都好少人，所以行得特別輕鬆。

行左大半日，早D訓先 ……

和庭日本料理.

今日係屋企攪左成日 —
起身就煮野食，跟住就睇哈爾移動城堡。
之後就整曲奇餅，再黎就打遊戲機。

攪左成日之後就出左去食晚飯，
去左新世紀既和庭日本料理。

入到去個Feel同水道橋差唔多，
連個Menu都差無幾，諗住佢都係貴夾唔飽搵老襯果渣。

點知食落又唔係衰到咁wow，
雖然佢都係屬於貴果D，加上佢D野上得好慢，
但係D材料都好新鮮，物有所值。
除左新鮮之外，每碟野都有番咁上下，
唔會話得果小小，所以平均黎講都好滿意呢間餐廳。

大尾篤BBQ之夜.

一連四日既復活節假期明天就開始喇，
所以今晚就攪番個BBQ之夜。

今晚我地有七人參與，
有肥健伉儷、謙哥伉儷、星爺、我同阿豬媽。

由於謙哥遲到既關係，
原定六點到達既先頭部隊要成七點半先去到。
我同阿豬媽因為要番工既關係，就成九點先入到去，
好彩，最後都可以全體一齊燒野食。

我地一去到就見到肥健黑晒面，
原來之前發生左一段小插曲 —
話說肥健帶左支燈去燒野食，
但係就比謙哥個Pat Pat整左落地爛左小小，
唔怪之肥健黑晒面啦。

雖然天氣好好，但係由於近海既關係，
勁大風，唔坐近D個爐都會變左雪條呀。
最後大家玩到十二點幾先番屋企，攰死左。