出車霉遇大霸王.

今日地球撲蝶隊出動，去大埔滘同鳳園影蝶。
結果今日勁靜，食白果收場。


下午出灣仔接女朋友放工，出左告士打道要Cut兩條線，
目的想行東隧。
Cut完之後見到後面架貨Van停左係度，
不以為然之下繼續行車。
之後果架貨Van係我右手邊Beep我，我都唔知乜事，以為阻住佢Only。
不以為然之下繼續行車。

沿東區走廊一直行，發現果架貨Van一路釣住我尾，
我慢佢慢，我快佢快，我轉線佢轉線，顯然佢係有心跟我。
過左東隧，佢駛到我既左手邊，我開窗問佢乜事，
佢話我係告士打道撞到佢架車，叫我駛埋一邊。
由於我冇撞到佢，加上係高速公路，我無理佢繼續行車。
出左大老山隧道，佢都仲跟住我，
於是我係沙田搵左個回旋處，同佢落車理論。

落車一睇，大家架車都冇事冇干，佢自己都表現出不相信的表情。
不過佢繼續凶我，話我撞到佢。我冇同佢嘈，叫佢報警。
佢番上車，拎起電話，打量一番，開車離開。
臨走時Dee我一句話下次Cut線小心D。

比佢煩左一輪之後，阿Kit姐夫都到了沙田，
佢建議去差館落一落簿，以免佢秋後算帳，
話我不顧而去。

攪左成個下午，最後都順利車左阿媽阿哥去加太賀食母親節飯，
算係不幸中之大幸吧。